मुंबई : महाराष्ट्र राज्य न्यायालय कर्मचारी महासंघाच्या आवाहनाला उत्स्फूर्त प्रतिसाद देत बुधवारी महाराष्ट्रातील सर्व संबंधित दुय्यम न्यायालयांमधील न्यायालयीन कर्मचाऱ्यांनी काळ्या फिती लावून शांततापूर्ण व शिस्तबद्ध पद्धतीने आंदोलन केले.
‘समान काम, समान वेतन’ तसेच उच्च न्यायालयातील कर्मचाऱ्यांप्रमाणे वेतनश्रेणी वाढविणे या प्रमुख मागण्यांसाठी महासंघाने यापूर्वीच शासनाला आंदोलनाची नोटीस दिली आहे. त्याच आंदोलनाचा पहिला टप्पा म्हणून एक दिवस काळ्या फिती लावून नियमित कामकाजावर उपस्थित राहण्याचे आंदोलन करण्यात आले.
मुंबईमध्ये या आंदोलनाला विशेषतः मोठा प्रतिसाद मिळाला. मुख्य न्याय दंडाधिकारी न्यायालय, मुंबई तसेच त्यांच्या अधिपत्याखालील न्याय दंडाधिकारी प्रथम वर्ग न्यायालये, शहर दिवाणी व सत्र न्यायालय, लघुवाद न्यायालय, कुटुंब न्यायालय आणि औद्योगिक न्यायालय येथील कर्मचाऱ्यांनी काळ्या फिती लावून आपल्या मागण्यांकडे शासनाचे लक्ष वेधले.