मुंबई : भारतीय तटरक्षक दलाने मुंबईजवळ समुद्रात मोठी कारवाई केली आहे. तेलाची तस्करी करणारी तीन जहाजे तटरक्षक दलाने पकडली असून या जहाजांमध्ये मोठ्या प्रमाणात तेल साठा सापडला आहे. ही परदेशी जहाजे समुद्रात तेलाची तस्करी करत होती. शुक्रवारी एका जटिल समुद्र-हवाई नेटवर्कच्या आधारे केलेल्या ऑपरेशनच्या माध्यमातून आंतरराष्ट्रीय तेल तस्करी रॅकेटचा पर्दाफाश केला आहे.
रॅकेटचा भाग असलेल्या या जहाजांनी संघर्षग्रस्त देशांमधून मोठ्या प्रमाणात स्वस्त तेल आणि तेल आधारित वस्तूंची तस्करी करुन आर्थिक फायदा कमावण्याचा मार्ग निवडला होता. ही जहाजे आंतरराष्ट्रीय समुद्रात वस्तूंची देवाणघेवाण करायची. या सिंडिकेटमध्ये काम करणारे हस्तक अनेक देशांमध्ये सक्रिय आहेत. जहाजे खोल समुद्रात असताना त्यांच्यात समन्वय राखण्याचे काम हस्तकांकडून केले जात असे. मुंबईपासून जवळपास १०० नॉटिकल मैलांवर पश्चिम दिशेला गुरुवारी भारतीय तटरक्षक दलाने तीन जहाजे थांबवली. तटरक्षक दलाचे कर्मचारी या जहाजांवर गेले. त्यांची सर्वत्र झडती घेण्यात आली. कागदपत्रांची तपासणी करण्यात आली. चालक, पथकाची चौकशी केली गेली. त्यातून जहाजांचा वापर तेलाच्या तस्करीसाठी होत असल्याचे स्पष्ट झाले.
सागरी राज्यांचा शुल्क चुकवण्याचा प्रयत्न भारतीय तटरक्षक दलाच्या टेक-इन्क्लुसिव्ह सिस्टिमने एका मोटर टँकरचा शोध घेतला. या टँकरच्या हालचाली संशयास्पद होत्या. त्यामुळे जहाजाच्या हालचालींचा डिजिटल तपास सुरु करण्यात आला. त्या जहाजांच्या आसपास असलेल्या अन्य जहाजांचा डेटा पॅटर्न तपासण्यात आला. दोन अन्य जहाजांवरील हालचालीदेखील संशयास्पद आढळून आल्या. त्यांच्याकडून समुद्रात तेलाशी संबंधित वस्तूंची तस्करी सुरु होती. ही जहाजे भारताच्या सागरी सीमा असलेल्या राज्यांमधील शुल्क चुकवण्याचा प्रयत्न करत होती.
जहाजांचे मालक परदेशी नागरिक
भारतीय तटरक्षक दलाच्या पथकाने जहाजांवर जाऊन डिजिटल पुरावे तपासले. त्यानंतर ही तीनही जहाजे ताब्यात घेण्यात आली. पुढील कारवाईसाठी या जहाजांना मुंबईत आणले जाणार आहे. या प्रकरणाचा पुढील तपास भारतीय सीमा शुल्क विभागाकडून केला जाईल. समुद्र किनारा लाभलेल्या राज्यांकडून कोणतीही कारवाई होऊ नये यासाठी जहाजांची ओळख वारंवार बदलली जायची. या जहाजांचे मालक परदेशी नागरिक आहेत.