मुंबईकरांसाठी आनंदाची बातमी असून गोराई येथे उभारण्यात आलेल्या महाराष्ट्रातील पहिल्या मँग्रोव्ह पार्कचं उद्घाटन अखेर २८ मे रोजी होणार आहे. अनेकदा उद्घाटन लांबल्यानंतर आता हे पार्क नागरिकांसाठी खुलं होणार आहे.
भाजप आमदार संजय उपाध्याय यांनी ही माहिती दिली असून उद्घाटन सोहळा २८ मे रोजी सकाळी १० वाजता पार पडणार आहे.
आदित्य ठाकरे यांच्या कार्यकाळात प्रकल्पाची सुरुवात
महाविकास आघाडी सरकारच्या काळात २०२१ मध्ये या प्रकल्पाची घोषणा करण्यात आली होती. त्यावेळी आदित्य ठाकरे हे पर्यावरण आणि पर्यटन मंत्री होते. सुमारे आठ हेक्टर परिसरात विकसित करण्यात आलेल्या या पार्कला ‘भारतरत्न अटल बिहारी वाजपेयी मँग्रोव्ह पार्क’ असं नाव देण्यात आलं आहे.
उद्घाटनाला कोण उपस्थित राहणार?
आमदार संजय उपाध्याय यांनी ‘एक्स’वरील पोस्टमध्ये दिलेल्या माहितीनुसार, मुख्यमंत्री देवेंद्र फडणवीस आणि केंद्रीय मंत्री पीयूष गोयल यांच्या हस्ते या मँग्रोव्ह पार्कचं उद्घाटन होणार आहे.
यावेळी राज्याचे वनमंत्री गणेश नाईक, मुंबई उपनगरचे पालकमंत्री आशिष शेलार, मंत्री मंगल प्रभात लोढा आणि माजी खासदार गोपाळ शेट्टी हे देखील उपस्थित राहणार आहेत.
काय आहेत पार्कची वैशिष्ट्यं?
मुंबईच्या किनारी परिसंस्थेचा जवळून अनुभव घेण्याची संधी या पार्कमुळे नागरिकांना मिळणार आहे. पार्कमधील मुख्य आकर्षण म्हणजे ७५० मीटर लांबीचा उंचावरील बोर्डवॉक. विशेष म्हणजे, एकही मँग्रोव्ह न तोडता हा बोर्डवॉक तयार करण्यात आला आहे. हा मार्ग पर्यटकांना थेट खाडीकिनाऱ्यावरील व्ह्यूइंग डेकपर्यंत घेऊन जातो.
पार्कमध्ये १८ मीटर उंचीचा बर्ड वॉचिंग टॉवर आणि दोन मजली ‘नेचर इंटरप्रिटेशन सेंटर’ देखील उभारण्यात आलं आहे. येथे लायब्ररी, कार्यशाळा, कॅफे, रूफटॉप रेस्टॉरंट आणि गिफ्ट शॉपची सुविधा असणार आहे.
पर्यावरण संवर्धनावर भर
मँग्रोव्ह संवर्धनाबाबत जनजागृती करण्यासोबतच नागरिकांना नैसर्गिक पर्यटनाचा अनुभव देण्याच्या उद्देशाने हा प्रकल्प विकसित करण्यात आला आहे.
दरम्यान, या पार्कचं उद्घाटन अशा वेळी होत आहे, जेव्हा कोस्टल रोड नॉर्थ अर्थात वर्सोवा-भाईंदर लिंक रोड प्रकल्पासाठी मोठ्या प्रमाणात मँग्रोव्ह तोड सुरू आहे.
मालाडमधील माइंडस्पेस परिसर आणि वर्सोवाजवळील अंबरनाथ टॉवर परिसरात ही तोड सुरू असून या प्रकल्पासाठी सुमारे १ लाख ३ हजार ६५० हेक्टर परिसरातील ४५ हजारांहून अधिक मँग्रोव्ह प्रभावित होणार आहेत. त्यापैकी ९ हजार मँग्रोव्ह कायमस्वरूपी तोडले जाणार असल्याची माहिती समोर आली आहे.