अमेरिका-इराण तणावाच्या पार्श्वभूमीवर देशात गॅस तुटवड्याची भीती निर्माण झाली असताना मुंबईत सायबर गुन्हेगारांनी याच भीतीचा गैरफायदा घेत नागरिकांना लक्ष्य केले आहे. महानगर गॅस लिमिटेड (MGL) चे अधिकारी असल्याचे भासवून नागरिकांना धमकावले जात असून, त्यांच्या मोबाईल आणि बँक खात्यांवर डल्ला मारला जात आहे.

गॅस तुटवड्याच्या भीतीचा गैरफायदा; नागरिकांची लूट सुरू

मुंबईत गेल्या महिनाभरात अशा फसवणुकीची अनेक प्रकरणे समोर आली असून जवळपास १ कोटी रुपयांची फसवणूक झाल्याचा अंदाज आहे. फसवणूक करणारे प्रथम नागरिकांना थकबाकी बिल आणि गॅस बंद होण्याचा इशारा देणारे संदेश पाठवतात. त्यानंतर ते छोट्या रकमेचे पेमेंट करून विश्वास संपादन करतात आणि पुढे APK फाइल डाउनलोड करण्यास भाग पाडतात.

APK फाइलमधून खात्यावर डल्ला

ही APK फाइल प्रत्यक्षात मालवेअर असते. ती डाउनलोड केल्यानंतर फसवणूक करणाऱ्यांना मोबाईलमधील OTP, बँकिंग माहिती आणि इतर संवेदनशील डेटा मिळतो. त्यामुळे काही मिनिटांतच बँक खात्यातील मोठी रक्कम काढली जाते.

धक्कादायक घटना

मुलुंड पश्चिम येथील २० वर्षीय व्यापाऱ्याने १,१५० रुपये भरल्यानंतर ‘Mahanagar gas bill update.apk’ नावाची फाइल डाउनलोड केली. त्यानंतर काही मिनिटांतच त्याच्या खात्यातून तब्बल ११.८२ लाख रुपये काढण्यात आले.

तर मालाड पूर्व येथील ७५ वर्षीय निवृत्त व्यक्तीलाही अशाच प्रकारे ८.५९ लाख रुपयांचा फटका बसला.

पोलिसांचा इशारा

मुंबई पोलिसांनी नागरिकांना सावध राहण्याचे आवाहन केले आहे. कोणतीही गॅस कंपनी APK फाइल पाठवत नाही किंवा फोनवरून OTP, पासवर्ड किंवा बँक तपशील मागत नाहीत, असे स्पष्ट करण्यात आले आहे.

काय काळजी घ्यावी?

• अनोळखी लिंक किंवा फाइल डाउनलोड करू नका

• फक्त अधिकृत वेबसाइट किंवा अ‍ॅप वापरा

• संशयास्पद कॉल किंवा संदेशांवर विश्वास ठेवू नका

• फसवणूक झाल्यास त्वरित १९३० या सायबर हेल्पलाइनवर संपर्क साधा

या प्रकारांमुळे नागरिकांनी अधिक सतर्क राहण्याची गरज असल्याचे पुन्हा एकदा अधोरेखित झाले आहे.