मुंबई : गंभीर आजारी रुग्णाला अतिदक्षता विभागात बेड्स उपलब्ध होत नसल्याचे अनेकदा समोर आले आहे. मुंबई महापालिकेच्या मोठ्या रुग्णालयांसह १६ उपनगरीय रुग्णालयात सहा हजारांहून अधिक बेड्स आहेत. मात्र अतिदक्षता विभागात फक्त ७९७ बेड्स उपलब्ध असल्याची माहिती समोर आली आहे. अतिदक्षता विभागात बेड्सची कमतरता असल्याने रुग्णांच्या जिवावर बेतू शकते. अतिदक्षता विभागात उपलब्ध बेड्सपैकी ३० बेड्स आरक्षित ठेवण्यात यावे, अशी मागणी जोर धरु लागली आहे.
दर्जेदार आरोग्य सुविधा उपलब्ध करून देण्यासाठी मुंबई महापालिका दरवर्षी कोट्यवधी रुपये खर्च करते. स्वस्त व दर्जेदार उपचार या विश्वासाने देशभरातील रुग्ण मुंबई महापालिकेच्या रुग्णालयात उपचारासाठी दाखल होत असतात. मात्र रुग्णालयात बेड्स मिळत नसल्याने गाद्या टाकून रुग्णांना जमिनीवर झोपवावे लागते किंवा एका बेडवर दोन रुग्ण ठेवले जातात. त्यामुळे मुंबई महापालिकेच्या अतिदक्षता विभागात ३० टक्के बेड्स अतिशय गंभीर रुग्णांसाठी वा गरजूंसाठी आरक्षित ठेवण्यात यावे, अशी ठरावाची सूचना नगरसेविका मेहेर हैदर यांनी मांडली असून येत्या ९ एप्रिल रोजी महापालिका सभागृहात चर्चा होणार आहे.
मुंबई महापालिकेच्या मोठया रुग्णालयात ६ हजार ४७३ खाटांपैकी अतिदक्षता विभागात ६८१, तर महापालिकेच्या लहान रुग्णालयात ३ हजार २५४ खाटापैकी अतिदक्षता विभागात केवळ ११६ खाटा आहेत. अतिदक्षता विभागातील खाटांची संख्या ही एकूण खाटांच्या तुलनेत अपुरी आहे. मुंबईतील वाढती लोकसंख्या, साथीचे रोग, अपघात, संसर्गजन्य रोग, माता आणि नवजात बालकांशी संबंधित गुंतागुंत लक्षात घेता आधुनिक नागरी आरोग्य व्यवस्थेमध्ये अतिदक्षता उपचारासाठी खाटाची संख्या जादा असणे गरजेचे आहे.
रुग्णालयांतील बेड्सची उपलब्धता
रुग्णालय एकूण आयसीयू
केईएम रुग्णालय २,२५० ३२८
नायर रुग्णालय १,६२३ १४०
सायन रुग्णालय १,८५० १७३
कूपर रुग्णालय ७५० ४०