मुंबई : मुंबई लोकलमध्ये गर्दी, धक्काबुक्की आणि किरकोळ कारणांवरून प्रवाशांमध्ये वाद होण्याच्या घटना वारंवार समोर येत आहेत. अशातच दरवाजाजवळ उभं राहण्यावरून झालेला किरकोळ वाद एका प्रवाशाच्या जीवावर बेतला असता. चर्चगेटहून विरारच्या दिशेने जाणाऱ्या फास्ट लोकलमध्ये दोन प्रवाशांमध्ये जोरदार हाणामारी झाली. या हाणामारीदरम्यान एका प्रवाशाचा तोल जाऊन तो धावत्या लोकलमधून थेट फलाटावर पडला. शुक्रवारी (६ नोव्हेंबर) रात्री सुमारे १०.३० वाजता मुंबई सेंट्रल स्थानकाजवळ ही घटना घडली. या धक्कादायक प्रकाराचा व्हिडिओही सोशल मीडियावर व्हायरल झाला आहे.
दरवाजात उभं राहण्यावरून वाद
मिळालेल्या माहितीनुसार, शुक्रवारी रात्री चर्चगेट-विरार फास्ट लोकलमधून प्रवासी प्रवास करत होते. लोकल ग्रँट रोड आणि मुंबई सेंट्रल स्थानकादरम्यान असताना दरवाजाजवळ उभं राहण्यावरून दोन प्रवाशांमध्ये शाब्दिक वाद सुरू झाला.
काही वेळातच हा वाद विकोपाला गेला आणि दोघांमध्ये धक्काबुक्की व हाणामारी सुरू झाली. त्याच वेळी लोकल मुंबई सेंट्रल स्थानकात प्रवेश करत होती. हाणामारीदरम्यान एका प्रवाशाचा तोल गेला आणि तो धावत्या लोकलमधून थेट फलाटावर पडला.
लोकलचा वेग कमी असल्याने मोठा अनर्थ टळला
लोकल मुंबई सेंट्रल स्थानकात प्रवेश करत असल्याने तिचा वेग तुलनेने कमी होता. त्यामुळे संबंधित प्रवासी गंभीर दुर्घटनेतून बचावल्याचं वृत्त आहे. मात्र, त्याला नेमकी किती दुखापत झाली, याबाबत अद्याप अधिकृत माहिती समोर आलेली नाही.
हाणामारीचा व्हिडिओ व्हायरल
या संपूर्ण प्रकाराचा व्हिडिओ सोशल मीडियावर व्हायरल झाला आहे. व्हिडिओमध्ये लोकलच्या दरवाजाजवळ दोन प्रवासी एकमेकांशी भांडताना दिसतात. त्यानंतर त्यातील एक प्रवासी अचानक खाली पडल्याचं दिसतं.
या घटनेमुळे मुंबई लोकलमधील प्रवाशांच्या सुरक्षेचा प्रश्न पुन्हा एकदा ऐरणीवर आला आहे. विशेषतः धावत्या लोकलच्या दरवाजाजवळ होणारी धक्काबुक्की आणि हाणामारी किती धोकादायक ठरू शकते, हे या घटनेतून स्पष्ट झालं आहे. दरम्यान, या प्रकरणात रेल्वे पोलिसांनी काही कारवाई केली आहे का, याबाबत अद्याप अधिकृत माहिती उपलब्ध झालेली नाही.