राणा दाम्पत्य राहत असलेल्या खार येथील लाव्ही इमारतीतील रहिवाशांना पालिकेने नोटीस बजावली आहे. इमारतीत नियमबाह्य बांधकाम झाल्याने रहिवाशांना नोटीस बजावण्यात आल्याचे पालिकेच्या एच पश्चिम विभागातील अधिकाऱ्याने सांगितले.
दरम्यान, पालिकेच्या नोटिसीनंतर राणा दाम्पत्यांनी न्यायालयात धाव घेतली असून, बांधकाम नियमित करण्यासाठी एक महिन्याची मुदत दिली आहे. त्यामुळे राणा दाम्पत्याला तूर्तास दिलासा मिळाला आहे.
खार पश्चिम, १४व्या रस्त्यावर ‘लाव्ही’ इमारतीत राणा दाम्पत्याचे घर आहे. या इमारतीत तसेच काही घरांमध्ये मंजूर आराखड्याव्यतिरिक्त अधिक बांधकाम करण्यात आल्याचे पालिकेचे म्हणणे आहे. पालिका नियमांचे उल्लंघन केल्याच्या तक्रारीवरून मुंबई महापालिकेने तपासणीसाठी कलम ४८८ नुसार नोटीस पाठवली आहे.