शिवसेनेच्या सत्तासंघर्षाच्या पार्श्वभूमीवर शिवाजी पार्कवर दसरा मेळाव्याला महापालिकेने दोन्ही गटांना परवानगी नाकारली आहे. मुंबई महापालिकेने परवानगी नाकारल्यानंतर आता शिवाजी पार्कवर होणाऱ्या दसरा मेळाव्याचा निर्णय उच्च न्यायालयात होणार आहे. रितसर परवानगी घेऊनही महापालिकेने कारवाई केल्याने शिवसेनेच्या ठाकरे गटाने उच्च न्यायालयात धाव घेतली आहे. त्यांच्या याचिकेवर आज सुनावणी होणार आहे. महापालिका प्रशासनावर राज्य सरकारचा दबाव असल्याचा आरोप याचिकेत करण्यात आला आहे. न्यायमूर्ती धानुका आणि न्यायमूर्ती कमल काथा यांच्या खंडपीठासमोर या याचिकेवर आज सुनावणी होणार आहे. शिंदे गटाचे आमदार सदा सरवणकर यांनी उच्च न्यायालयात लवाद याचिका दाखल केली आहे. शिवसेनेची याचिका दिशाभूल करणारी असल्याचा दावा शिंदे गटाने याचिकेत केला आहे.

मुंबई महापालिकेने मुंबई पोलिसांकडून अभिप्राय मागवला होता. दसरा मेळाव्याला कोणाला परवानगी दिली जाऊ शकते? यासंदर्भात मुंबई पोलिसांकडून महापालिकेला अभिप्राय देण्यात आला होता. मुंबई पोलिसांनी दिलेल्या अभिप्रायानुसार, मुंबई महापालिकेने दोन्ही गटांना परवानगी नाकारल्याचे म्हटले आहे. काही दिवसांपूर्वी दादर आणि प्रभादेवीमध्ये शिवसैनिक आणि शिंदे गट आमनेसामने आले होते. त्यावेळी शिवसेनेने शिंदे गटाचे आमदार सदा सरवणकर यांच्यावर हवेत गोळीबार केल्याचा आरोप केला होता. या पार्श्वभूमीवर दसरा मेळाव्यावरूनही कायदा व सुव्यवस्थेचा प्रश्न निर्माण होऊ शकतो, असे पोलिसांचे म्हणणे आहे. त्यामुळे परवानगी नाकारण्यात आल्याचे पत्रात नमूद करण्यात आले आहे. दरम्यान, दसऱ्याच्या दिवशी शिवतीर्थ म्हणजेच शिवाजी पार्क येथे होणाऱ्या दसरा मेळाव्यासाठी राज्यभरातील शिवसैनिक शिवाजी पार्कवर दाखल होतात. मात्र शिवसेनेतील अंतर्गत बंडखोरीमुळे शिवसेनेत उभी फूट पडली असून पक्षाचे नेतेपद, पक्ष, पक्षाचे चिन्ह आणि आता थेट ठाकरे यांच्याकडून दसरा मेळावा हायजॅक करण्याचा शिंदे गटाचा प्रयत्न आहे.

वांद्रे येथील मैदानाला परवानगी मिळाल्यानंतरही शिंदे गट शिवाजी पार्क मैदानासाठी आग्रही आहे. त्यामुळे परवानगी मिळो अथवा न मिळो, यंदाचा दसरा मेळावा शिवतीर्थावर होणारच, असा आक्रमक पवित्रा शिवसेनेने घेतला आहे. या सर्व घडामोडींच्या पार्श्वभूमीवर उच्च न्यायालयात आजची सुनावणी अत्यंत महत्त्वाची आहे. त्यामुळे आज हायकोर्टात कोणाला दिलासा मिळणार हे पाहणे महत्त्वाचे ठरणार आहे.