पार्टी ड्रग्ज विक्रीसाठी आलेल्या एका तरुणाला वरळी युनिटच्या अंमली पदार्थ विरोधी पथकाच्या अधिकाऱ्यांनी अटक केली. त्याच्याकडून पोलिसांनी सुमारे २७ लाख रुपयांचा एमडीएमए आणि चरसचा साठा हस्तगत केला आहे. अटकेनंतर त्याला किल्ला कोर्टाने मंगळवार ४ जुलैपर्यंत पोलीस कोठडी सुनावली आहे.
एमडीएमए हे पार्टी ड्रग्ज म्हणून परिचित असल्याचे पोलिसांनी सांगितले. दादर येथे काही जण ड्रग्जची डिलिव्हरी देण्यासाठी येणार असल्याची माहिती वरळी युनिटच्या अधिकाऱ्यांना मिळाली होती. या माहितीनंतर पोलिसांनी दादरच्या डॉ. रत्नाकर भैंडकर मार्ग, रोझव्हिला इमारतीजवळ साध्या वेशात पाळत ठेवून एका २६ वर्षांच्या तरुणाला चौकशीसाठी ताब्यात घेतले होते. त्याच्या अंगझडतीत पोलिसांना १६ लाख २६ हजार रुपयांच्या ११५ एमडीएमए गोळ्या, १० लाख ६२ हजार रुपयांचे ३५४ ग्रॅम वजनाचे चरस सापडले. या ड्रग्जची किंमत सुमारे २७ लाख रुपये आहे.
तपासात आरोपी हा मालाडच्या एका कॉल सेंटरमध्ये कामाला असून गेल्या एक वर्षांपासून ड्रग्ज तस्करीच्या गुन्ह्यांत सक्रिय असल्याचे समोर आले. यापूर्वीही त्याने ड्रग्जची विक्री केल्याचे तपासात उघडकीस आले आहे. त्याच्याविरुद्ध एनडीपीएस कलमांतर्गत कारवाई करण्यात आली असून याच गुन्ह्यांत तो सध्या पोलीस कोठडीत आहे. या गुन्ह्यांत त्याचे इतर कोणी सहकारी आहेत का, त्याला ते ड्रग्ज कोण देत होते, तो ड्रग्ज कोणाला विक्री करत होता, याचा आता पोलीस तपास करत आहेत.