मुंबई : निरंकुशता किंवा हुकूमशाही देशासाठी हानिकारक आहे. त्यामुळे केंद्रात महाआघाडीचे सरकार असण्याची गरज आहे. भाजपविरोधी इंडिया आघाडी चांगले सरकार देऊ शकते. आपल्याला खंबीर नेत्याची गरज आहे. मात्र, त्यांनी सर्वांना बरोबर घेऊन चालले पाहिजे, असे प्रतिपादन शिवसेना (उबाठा) गटाचे प्रमुख उद्धव ठाकरे यांनी शनिवारी केले. राज्यातील महाविकास आघाडी लवकरच राज्यात संयुक्त रॅली काढणार असल्याचेही ते म्हणाले.
जळगाव जिल्ह्यातील भारतीय जनता पक्ष (भाजप), भारत राष्ट्र समिती (बीआरएस) आणि वंचित बहुजन आघाडी (व्हीबीए) च्या पदाधिकाऱ्यांनी आपल्या पक्षात प्रवेश केल्यावर मुंबईतील ‘मातोश्री’ या त्यांच्या निवासस्थानी ते बोलत होते. त्यावेळी त्यांनी सांगितले की, गेल्या १० वर्षांत देशात एवढ्या मोठ्या प्रमाणावर असंतोष प्रथमच दिसून येत आहे. हुकूमशाही देशासाठी हानिकारक आहे. एक वेळ अशी होती की, आघाड्यांचे सरकार असू नये. पण पी. व्ही. नरसिंह राव, अटलबिहारी वाजपेयी तसेच मनमोहन सिंग यांनी आघाडीचे सरकार चांगले चालवले. काही अपवाद वगळता, देशात आघाडी सरकारांनी चांगले काम केले आहे. आम्हाला एक मजबूत देश आणि आघाडीचे सरकार हवे आहे. आम्हाला एक मजबूत नेता हवा आहे, परंतु तो सर्वांना सोबत घेऊन जाईल.