नवी दिल्ली :सत्ताधारी भाजपला २०२२-२३ या काळात निवडणूक रोख्यातून १३०० कोटी रुपये मिळाले आहेत. ही रक्कम काँग्रेसला मिळालेल्या रकमेपेक्षा सात पटीने अधिक आहे.

२०२२-२३ ला भाजपला २१२० कोटी रुपये देणगी मिळाली. त्यातील ६१ टक्के रक्कम ही निवडणूक रोख्यातून मिळाली. पक्षाने निवडणूक आयोगाकडे ही माहिती दिली आहे. २०२१-२२ मध्ये भाजपला १७७५ कोटी रुपये देणगी दिली होती, तर भाजपला २०२२-२३ मध्ये २३६०.८ कोटी रुपये उत्पन्न मिळाले. २०२१-२२ मध्ये भाजपला एकूण १९१७ कोटी रुपये उत्पन्न मिळाले होते. भाजपला २०२२-२३ ला २३७ कोटी रुपये व्याज मिळाले, तर २०२१-२२ मध्ये भाजपला १३५ कोटी रुपये व्याज मिळाले होते. काँग्रेसला २०२२-२३ मध्ये १७१ कोटी रुपये निवडणूक रोख्यातून मिळाले, तर २०२१-२२ मध्ये २३६ कोटी रुपये निवडणूक रोख्यातून मिळाले. ‘सपा’ला निवडणूक रोख्यातून २०२१-२२ मध्ये ३.२ कोटी रुपये मिळाले होते. २०२२-२३ मध्ये त्यांना निवडणूक रोख्यातून काहीही उत्पन्न मिळाले नाही. तेलगू देसमला २०२२-२३ ला ३४ कोटी रुपये मिळाले.

२०२२-२३ मध्ये भाजपने निवडणुकीसाठी विमान व हेलिकॉप्टरसाठी ७८.२ कोटी रुपये खर्च केले. २०२१-२२ मध्ये ११७.४ कोटी रुपये भाजपने विमान व हेलिकॉप्टरसाठी खर्च केले.