गुजरात निवडणूक अगदी काही दिवसांवर आल्या आहेत. (AAP in Gujrat Election) अशामध्ये आता सर्वच पक्षांची प्रचाराची रणधुमाळी सुरु झाली आहे. यावेळी अरविंद केजरीवाल (Arvind Kejriwal) यांचा आम आदमी पक्षदेखील गुजरातच्या मैदानात उतरला आहे. आपचे सर्वेसर्वा अरविंद केजरीवाल यांनी, ही निवडणूक आम्हीच जिंकणार असा दावा केला आहे. एवढंच नव्हे तर, त्यांनी एका कोऱ्या कागदावर लिहून त्यावर स्वाक्षरी करून गुजरात जिंकण्याचा ठाम आत्मविश्वास व्यक्त केला.

अरविंद केजरीवाल यावेळी म्हंटले की,"दिल्ली विधानसभा निवडणुकीवेळी आप सरकार बनवेल, अशी भविष्यवाणी मी केली होती. पंजाब विधानसभेतदेखील सर्व दिग्गज पराभूत होऊन, आपच सरकार येईल असे सांगितले होते. त्यावेळी माझ्यावर कोणीच विश्वास ठेवला नव्हता. आताही मी भविष्यवाणी करतो की, गुजरातमध्ये २७ वर्षांच्या शासनाचा अंत होईल आणि यंदा आप सत्ता स्थापन करेल." यावेळी त्यांनी ही भविष्यवाणी एका कोऱ्या कागदावर लिहून स्वतःची स्वाक्षरी केली.

पुढे ते म्हणाले की, "गुजरात राज्य हे बदलाच्या प्रतीक्षेत आहे. गुजरातच्या सर्व नागरिकांमध्ये परिवर्तन घडवण्याची ताकद आहे. ते 'आप'ला कौल देतील आणि २७ वर्षाचं दु:शासन हटवतील. भाजपचे मतदार 'आप'ला मतदान करतील. विश्वास बसत नसेल तर लिहून देतो. भाजप गुजरातवर अत्याचार करत आहे."