नवी दिल्ली : राज्यसभेच्या ३७ जागांसाठीची निवडणूक प्रक्रिया सुरू झाली असून भाजपने आपल्या नऊ उमेदवारांची पहिली यादी जाहीर केली आहे. भाजपचे राष्ट्रीय अध्यक्ष नितीन नबीन यांना बिहारमधून उमेदवारी देण्यात आली आहे. महाराष्ट्रात सात जागांसाठी निवडणूक होणार असून अद्याप उमेदवारांच्या नावांची घोषणा करण्यात आलेली नाही.

भाजपने जाहीर केलेल्या उमेदवारांच्या यादीत नितीन नवीन, शिवेश कुमार (बिहार), तेराश गोवाला, जोगेन मोहन (आसाम), लक्ष्मी वर्मा (छत्तीसगड), संजय भाटिया (हरयाणा), मनमोहन सामल, सुजीत कुमार (ओदिशा) आणि राहुल सिन्हा (पश्चिम बंगाल) यांचा समावेश आहे.

३७ जागांसाठी निवडणूक

राज्यसभा निवडणुकीसाठी १६ मार्चला मतदान होणार आहे. राज्यसभेच्या ३७ जागांपैकी सर्वाधिक ७ जागा महाराष्ट्रातून निवडून दिल्या जाणार आहेत. तमिळनाडूतून ६, बिहार आणि पश्चिम बंगालमधून ५ आणि ओदिशातून ४, आसामधून ३, तेलंगणातून २ आणि छत्तीसगड, हरयाणा आणि हिमाचल प्रदेशमधून प्रत्येकी एक जागेसाठी निवडणूक जाहीर झाली आहे.