नवी दिल्ली : अमेरिकेच्या फेडरल न्यायालयाने अदानी समूहाचे अध्यक्ष गौतम अदानी, त्यांचे पुतणे सागर अदानी आणि अदानी ग्रीन एनर्जीचे मुख्य कार्यकारी अधिकारी विनीट जैन यांच्यावरील फसवणुकीचे आरोप फेटाळून लावले आहेत. यामुळे या प्रकरणात आता अदानी यांच्याविरुद्ध अमेरिकेत पुन्हा खटला दाखल करता येऊ शकणार नाही.
या प्रकरणातील लाचखोरीच्या आरोपांची भारतीय न्यायालये किंवा नियामक संस्थांनी कधीही चौकशी केलेली नसताना, अमेरिकेच्या न्याय विभागाने त्यासंदर्भातील भारतीय न्यायालयीन व नियामक आदेशांचा आधार घेतल्याबद्दल न्यायाधीशांनी तीव्र नाराजी व्यक्त केली.
अमेरिकेच्या ईस्टर्न डिस्ट्रिक्ट ऑफ न्यूयॉर्कच्या जिल्हा न्यायालयाचे न्यायाधीश निकोलस गारॉफिस यांनी सोमवारी (१० ऑगस्ट) जारी केलेल्या ४७ पानी आदेशात अमेरिकेच्या न्याय विभागाने आरोपपत्र मागे घेण्यासाठी केलेली मागणी अंशतः मंजूर केली. त्यामुळे गौतम अदानी, सागर अदानी आणि विनीट जैन यांच्याविरोधातील फसवणुकीच्या कटाचे तसेच सिक्युरिटीज फसवणुकीचे आरोप कायमस्वरूपी फेटाळण्यात आले.
मात्र, अन्य पाच आरोपींवरील फॉरेन करप्ट प्रॅक्टिसेस अॅक्ट अंतर्गत लाचखोरीचा आरोप कायम ठेवण्याबाबत न्यायालयाने सध्या निर्णय राखून ठेवला आहे. या पाच जणांमध्ये अक्षय ऊर्जा कंपनी अझ्युर पॉवरचे माजी अधिकारी रंजीत गुप्ता आणि रुपेश अग्रवाल तसेच अझ्युर पॉवरमध्ये मोठी गुंतवणूक असलेल्या कॅनेडियन पेन्शन फंडा चे माजी अधिकारी सिरिल कॅबानेस, सौरभ अग्रवाल आणि दीपक मल्होत्रा यांचा समावेश आहे.
या निर्णयापूर्वी न्यायालय आणि अमेरिकेच्या न्याय विभागामध्ये जवळपास दोन महिन्यांपासून आरोप मागे घेण्याच्या निर्णयावरून मतभेद सुरू होते. न्याय विभागाने १८ मे रोजी या खटल्यातील कारवाई थांबविण्याची मागणी केली होती. मात्र, न्यायाधीश गारॉफिस यांनी सुरुवातीला ही मागणी तातडीने मंजूर करण्यास नकार दिला होता.