नवी दिल्ली : लोकसभेत शुक्रवारी अर्थसंकल्पीय अधिवेशनाच्या पहिल्या टप्प्याच्या अखेरच्या दिवशी विरोधकांनी केंद्रीय मंत्री हरदीपसिंग पुरी यांच्या राजीनाम्याची मागणी केली. यामुळे प्रश्नोत्तराचा तास गोंधळामुळे विस्कळीत झाला. सभागृहाचे कामकाज आता ९ मार्चपर्यंत तहकूब करण्यात आले आहे. लोकसभेतील विरोधी पक्षनेते राहुल गांधी यांना सत्तेसाठी देशाचे विभाजन करावयाचे होते, असा आरोप भाजपने यावेळी केला.
केंद्रीय मंत्री हरदीप पुरी यांच्या राजीनाम्याची मागणी करणारे खासदार घोषणाबाजी करत होते. यानंतर सभापती संध्या राय यांनी लोकसभा दुपारी १२ वाजेपर्यंत तहकूब केली. दुपारी १२ वाजता कामकाज सुरू झाले. या काळात शिक्षण आणि कायदा मंत्रालयाचे प्रतिनिधित्व करणाऱ्यांसह अनेक मंत्र्यांनी विधेयके सादर केली. त्यानंतर सभागृहाचे कामकाज ९ मार्चपर्यंत तहकूब करण्यात आले.
संसदेचे अर्थसंकल्पीय अधिवेशन दोन टप्प्यात होत आहे. २३ दिवसांच्या विश्रांतीनंतर, अधिवेशनाचा दुसरा भाग ९ मार्च रोजी सुरू होईल आणि तो २ एप्रिलपर्यंत चालेल. दरम्यान, भाजप खासदार निशिकांत दुबे यांनी शुक्रवारी राहुल गांधींवर आरोप केले की, ते सत्ता मिळवण्यासाठी देशाच्या फाळणीचे नियोजन करत होते.