रस्त्यावर सुरू असलेला वाद, जमलेली गर्दी आणि हातात बेल्ट घेऊन एका महिलेला मारहाण करणारा व्यक्ती... मध्य प्रदेशातील इंदूरमधील विजय नगर परिसरातील हा धक्कादायक व्हिडिओ सध्या सोशल मीडियावर मोठ्या प्रमाणात व्हायरल होत आहे. व्हिडिओमध्ये संबंधित व्यक्ती भररस्त्यात महिलेला बेल्टने मारहाण करताना दिसत आहे, तर आजूबाजूला उपस्थित असलेले अनेक जण हा प्रकार मोबाईलमध्ये चित्रीत करत असल्याचेही पाहायला मिळते. सोशल मीडियावर करण्यात येणाऱ्या दाव्यानुसार, मारहाण करणारा व्यक्ती महिलेचा पती असून तिला दुसऱ्या पुरुषासोबत पाहिल्यानंतर हा प्रकार घडला. मात्र, या दाव्याला अद्याप अधिकृत दुजोरा मिळालेला नाही.
व्हिडिओमध्ये नेमके काय दिसते?
व्हायरल व्हिडिओनुसार, संबंधित महिला एका पुरुषासोबत ॲक्टिव्हा स्कूटरवर जात असताना तिच्या पतीने त्यांना अडवले. त्यानंतर दोघांमध्ये वाद सुरू झाला. काही क्षणांतच संतापलेल्या व्यक्तीने बेल्ट काढून महिलेला भररस्त्यात मारहाण करण्यास सुरुवात केल्याचे व्हिडिओमध्ये दिसते.
घटना सुरू असताना परिसरात मोठी गर्दी जमल्याचेही दिसून येते. अनेक जण हा प्रकार मोबाईलमध्ये चित्रीत करताना दिसतात. व्हिडिओच्या शेवटी एक व्यक्ती पुढे येत संबंधित व्यक्तीला थांबवण्याचा प्रयत्न करत असल्याचेही दिसते.
व्हायरल व्हिडिओ पाहा
सोशल मीडियावर संताप
हा व्हिडिओ समोर आल्यानंतर सोशल मीडियावर विविध प्रतिक्रिया उमटत आहेत. भररस्त्यात महिलेवर झालेल्या मारहाणीबद्दल अनेकांनी संताप व्यक्त केला असून, उपस्थित लोकांनी सुरुवातीलाच हस्तक्षेप का केला नाही, असा प्रश्नही अनेकांनी उपस्थित केला आहे.
दरम्यान, व्हिडिओसोबत करण्यात येणारे दावे अद्याप स्वतंत्रपणे पडताळले गेलेले नाहीत. व्हिडिओतील व्यक्तींची ओळख, त्यांच्यातील नाते तसेच हा वाद नेमका कोणत्या कारणावरून झाला, याबाबत अधिकृत माहिती समोर आलेली नाही. याप्रकरणी स्थानिक पोलिसांकडूनही अद्याप कोणतेही अधिकृत निवेदन जारी करण्यात आलेले नाही. तसेच या घटनेची नोंद झाली आहे का किंवा पोलिसांनी तपास सुरू केला आहे का, याबाबतही अद्याप स्पष्टता आलेली नाही.