नवी दिल्ली: कथित ३ कोटी रुपयांच्या लाच प्रकरणात केंद्रीय अन्वेषण विभागाने (सीबीआय) दीपक गहलवत नावाच्या वरिष्ठ आयपीएस अधिकाऱ्याला अटक केली आहे. हे अधिकारी सध्या नागरी विमान वाहतूक सुरक्षा ब्युरो मध्ये सहसंचालक म्हणून कार्यरत होते. बनावट औषध निर्मिती रॅकेटच्या तपासाशी संबंधित हे प्रकरण असल्याचे समोर आले आहे.
सीबीआयने दिलेल्या माहितीनुसार, पुद्दुचेरी येथील एका व्यावसायिकावर बनावट औषध निर्मिती प्रकरणी सीबीआयचा तपास सुरू होता. या तपासात व्यावसायिकाला मदत करण्यासाठी आणि त्याच्या बाजूने निकाल लावण्यासाठी गहलवत यांनी लाचेची मागणी केली होती.
सीबीआयमधील अधिकाऱ्यांवर आपला प्रभाव असल्याचे सांगून त्यांनी हे कृत्य केल्याचा आरोप आहे. या प्रकरणाच्या तपासासाठी सीबीआयने अधिकाऱ्याच्या संबंधित ठिकाणांवर छापे टाकून अनेक डिजिटल उपकरणे, हार्ड डिस्क आणि महत्त्वाची कागदपत्रे जप्त केली आहेत.