रविकिरण देशमुख
मुंबई : शिवसेना ठाकरे गटाचे सहा बंडखोर खासदार लोकसभेचे अध्यक्ष ओम बिर्ला यांना नेमके कधी व कुठे भेटले याविषयी सध्या तर्क चालू आहेत. सूत्रांच्या माहितीनुसार, मंगळवारी रात्री उशिरा ही भेट जयपूरमध्ये एका हॉटेलात पार पडली.
या भेटीसाठी नांदेडहून संजय देशमुख आणि पाटील आष्टीवकर यांचे विशेष विमान रवाना झाले, तर संजय जाधव यांच्यासाठीही त्याच शहरातून स्वतंत्र विमानाची व्यवस्था करण्यात आली होती. तसेच, भाऊसाहेब वाकचौरे हैदराबादहून, ओमप्रकाशराजे निंबाळकर पुण्याहून, तर संजय दिना पाटील मुंबईहून जयपूरला पोहोचले.
मंगळवारी मध्यरात्रीनंतर हे सर्व बंडखोर खासदार दिल्लीत एकत्र आले आणि तेथे शिवसेना नेते व उपमुख्यमंत्री एकनाथ शिंदे यांचे सुपुत्र खासदार श्रीकांत शिंदे यांच्या उपस्थितीत सर्वजण जयपूरला रवाना झाले. जयपूरमध्ये या सहा खासदारांनी स्वाक्षरी केलेले पत्र लोकसभा अध्यक्षांकडे सादर केले. या भेटीदरम्यान उपमुख्यमंत्री एकनाथ शिंदेही उपस्थित होते, असे समजते.
भेटीनंतर सर्व खासदार आपापल्या गंतव्य स्थानी रवाना झाले. घडामोडींची माहिती असलेल्या एका राजकीय व्यक्तीने सांगितले की, बंडखोर खासदारांनी दिलेल्या पत्राला लोकसभा अध्यक्षांनी बुधवारी रात्री मंजुरी दिली आहे. येत्या एक-दोन दिवसांत याबाबतची अधिकृत घोषणा होण्याची शक्यता आहे.
राजकीय घडामोडींसाठी दिल्ली टाळण्याचा निर्णय हा प्रामुख्याने प्रसारमाध्यमांची नजर चुकवण्यासाठी आणि राजकीय प्रतिस्पर्ध्यांपासून सावध राहण्यासाठी घेतल्याचे समजते. "सर्व काही नियोजित वेळेनुसार झाले, त्यामुळे याचे कोणतेही चित्रीकरण बाहेर येण्याची शक्यता कमी आहे," असे एका सूत्राने सांगितले.
दरम्यान, हे बंडखोर खासदार गुरुवारी रात्री उशिरा मुंबईत पोहोचणार असून, त्यांना गोरेगाव येथील एका हॉटेलमध्ये ठेवले जाण्याची शक्यता आहे. शुक्रवारी दुपारी एकनाथ शिंदे यांच्या नेतृत्वाखालील शिवसेनेच्या वतीने पक्षाच्या स्थापना दिनानिमित्त नेस्को येथे आयोजित रॅलीला हे खासदार उपस्थित राहतील, असे मानले जात आहे.