Rule Changes from 1st August: जुलै महिना संपला असून आजपासून ऑगस्ट महिना सुरू झाला आहे. देशात प्रत्येक महिन्याच्या पहिल्या दिवशी नियमांमध्ये अनेक बदल पाहायला मिळतात. याचप्रमाणे आज १ ऑगस्ट रोजी सुद्धा काही बदल झाले आहेत. या बदलाचा थेट परिणाम तुमच्या खिशावर होईल. ऑगस्टच्या पहिल्या दिवशी, एलपीजी सिलेंडरच्या (LPG Cylinder Price) किमती आणि एचडीएफसी (HDFC) बँकेच्या क्रेडिट कार्डच्या (Credit Card Rule Change) नियमांमध्ये बदल झाला आहे. यासोबतच गुगल मॅपच्या (Google Map) वापरावरही परिणाम होणार आहे. आजपासून फास्टॅगशी (FASTag new rules) संबंधित सेवांवर नवीन नियम लागू झाले आहेत.

'हे' बदल बघायला मिळणार

एलपीजी गॅस सिलिंडरच्या किमती

१ ऑगस्ट २०२४ पासून १९ किलो व्यावसायिक एलपीजी गॅस सिलिंडरच्या (Commercial PLG Cylinder) किमती ८.५० रुपयांनी वाढवल्या आहेत. परंतु, १४ किलो घरगुती गॅस सिलिंडरची किमतीमध्ये काहीही बदल झालेला नाही.

गुगल मॅप्समध्ये मोठा बदल

गुगल मॅप भारतात मोठा बदल घडवत आहे. १ ऑगस्टपासून, कंपनी आपले सेवा शुल्क ७०% ने कमी करत आहे जेणेकरून अधिकाधिक युजर्स या सेवेचा फायदा घेऊ शकतील. सामान्य वापरकर्त्यांना कोणतेही नवीन शुल्क भरावे लागणार नाही, याचा अर्थ त्यांच्या गुगल मॅपच्या दैनंदिन वापरावर कोणताही परिणाम होणार नाही.

HDFC बँक क्रेडिट कार्डवर अतिरिक्त शुल्क

एचडीएफसी बँकेचे क्रेडिट कार्डचे नियम १ ऑगस्टपासून बदलत आहेत. आता तुम्हाला काही खर्चांवर अतिरिक्त शुल्क भरावे लागेल. CRED, Cheq, MobiKwik, Freecharge इत्यादी ॲप्सद्वारे क्रेडिट कार्डद्वारे भाडे भरल्यास १% व्यवहार शुल्क आकारले जाईल. याशिवाय ५,००० रुपयांपेक्षा जास्त किमतीचे पेट्रोल आणि डिझेल एकाच वेळी भरल्यास १% शुल्क आकारले जाईल, तसेच ५०,००० रुपयांपेक्षा जास्त वीज आणि पाणी बिल भरल्यास १% शुल्क आकारण्यात येईल. बँकेने उशीरा पेमेंट आणि सुलभ ईएमआयसाठी शुल्क देखील वाढवले ​​आहे.

नवीन कर प्रणाली

जर तुम्ही ITR भरण्याची अंतिम मुदत चुकवली असेल, तर १ ऑगस्टपासून नवीन कर व्यवस्था तुमच्यासाठी डीफॉल्ट मानली जाईल. तुम्ही ३१ डिसेंबर २०२४ पर्यंत उशीर झालेला ITR दाखल केला तरीही, तुम्ही करासाठी जुन्या कर प्रणालीची निवड करू शकणार नाही.

FASTag मध्ये बदल

आजपासून फास्टॅगशी (FASTag new rules) संबंधित सेवांवर नवीन नियम लागू झाले आहेत. नवीन नियमानुसार आता वाहन घेतल्यानंतर ९० दिवसांच्या आत फास्टॅग नंबरवर वाहन नोंदणी क्रमांक अपलोड करावा लागणार आहे. असे न झाल्यास तुमच्या नंबरला हॉटलिस्टमध्ये टाकले जाईल. यानंतर ३० दिवसांचा अतिरिक्त वेळ दिला जाईल. या अतिरिक्त वेळेतही ट्रेन नंबर अपडेट न केल्यास तुमच्या नंबरला फास्टॅग काळ्या यादीत टाकले जाईल. त्याच वेळी, फास्टॅग सेवा पुरवठादार कंपन्यांना ३१ ऑक्टोबरपर्यंत ५ आणि ३ वर्षे जुन्या सर्व फास्टॅगचे KYC करावे लागेल.