नवी मुंबई : आरोग्यदायी वातावरणात सकाळची सुरुवात करता यावी, यासाठी वाशी येथील प्रसिद्ध मिनी सी शोर परिसरात पहाटेपासून नागरिकांची मोठी गर्दी होत असते. ज्येष्ठ नागरिकांपासून तरुणांपर्यंत अनेक जण येथे चालणे, धावणे, योगासने, व्यायाम आणि सायकलिंग करण्यासाठी येतात. मात्र, शुक्रवारी पहाटे या परिसरात धुक्यासारखे दिसणारे वातावरण नागरिकांसाठी चिंतेचा विषय ठरले. काही वेळाने हे धुके नसून हवेत पसरलेले प्रदूषण असल्याचे जाणवताच नागरिकांमध्ये अस्वस्थता निर्माण झाली.

नवी मुंबईतील मोकळ्या आणि सार्वजनिक जागांपैकी मिनी सी शोरला विशेष महत्त्व आहे. पहाटे पाच ते साडेपाच वाजल्यापासून येथे ज्येष्ठ नागरिक, महिला, तरुण, धावपटू, सायकलस्वार आणि नियमित व्यायाम करणाऱ्यांची गर्दी सुरू होते. मात्र, आरोग्य चांगले राहावे म्हणून घराबाहेर पडलेल्या नागरिकांनाच प्रदूषित हवेत श्वास घ्यावा लागत असेल, तर हा व्यायाम कितपत सुरक्षित आहे, असा प्रश्न उपस्थित होत आहे.

मिनी सी शोरवर नियमित मॉर्निंग वॉकसाठी येणारे नितीन कांबळे म्हणाले, गेल्या अनेक वर्षांपासून मी येथे नियमित मॉर्निंग वॉकसाठी येतो. शुक्रवारी धुक्यासारखे दिसणारे वातावरण प्रत्यक्षात प्रदूषणाचे असल्याचे जाणवले. त्यामुळे चिंता वाटली.

आरोग्य चांगले राहावे म्हणून घराबाहेर पडायचे आणि प्रदूषित हवा श्वासातून घ्यायची, अशी परिस्थिती असेल तर व्यायामासाठी जायचे तरी कुठे ? महापालिकेने तातडीने दखल घेऊन या परिसरातील हवेची गुणवत्ता तपासावी आणि प्रदूषणाचे नेमके कारण शोधून कायमस्वरूपी उपाययोजना कराव्यात.

नवी मुंबई निरोगी नागरिकांचे शहर कधी होणार?

मिनी सी शोरसारख्या जागा केवळ सुशोभीकरणासाठी नसून नागरिकांच्या आरोग्यासाठी महत्त्वाच्या आहेत. 'स्मार्ट सिटी'सोबत नवी मुंबई 'स्वच्छ हवा आणि निरोगी नागरिकांचे शहर' कधी होणार? असा प्रश्न नागरिक उपस्थित करत आहेत. या परिसरात कायमस्वरूपी हवा गुणवत्ता मापक यंत्रणा (AQI मॉनिटर) बसविण्याची गरज आहे. तसेच प्रमुख प्रदूषकांचे प्रमाण नागरिकांना प्रत्यक्ष पाहता यावे, यासाठी डिजिटल डिस्प्ले बसवावा. हवेची गुणवत्ता धोकादायक पातळीवर गेल्यास नागरिकांना व्यायाम टाळण्याबाबत सूचना देण्याची व्यवस्था करावी, अशी मागणीही नागरिकांकडून करण्यात येत आहे.

(इंग्रजी बातमी वाचण्यासाठी येथे क्लिक करा.)