पनवेल : पनवेल-जेएनपीटी मार्गावर भरधाव ट्रेलरने दुचाकीला पाठीमागून जोरदार धडक दिल्याने सख्ख्या भाऊ-बहिणीचा जागीच मृत्यू झाल्याची दुर्दैवी घटना शुक्रवारी सकाळी घडली. या घटनेमुळे परिसरात हळहळ व्यक्त होत असून पनवेल शहर पोलिसांनी ट्रेलरचालकाला ताब्यात घेतले आहे.
या अपघातात प्रांशु भारद्वाज सिंग (१८) आणि त्याची बहीण वंशिका भारद्वाज सिंग (२०) यांचा मृत्यू झाला.
दोघेही पनवेलमधील इंडिया बुल्सच्या डेफोनिक्स टॉवरमध्ये राहत होते. ते दुचाकीवरून पनवेल-जेएनपीटी मार्गाने जेएनपीटीच्या दिशेने जात असताना मागून येणाऱ्या टाटा कंपनीच्या ट्रेलरने त्यांच्या दुचाकीला डाव्या बाजूने जोरदार धडक दिली. धडक इतकी भीषण होती की, दोघेही रस्त्यावर फेकले गेले आणि गंभीर दुखापतीमुळे त्यांचा जागीच मृत्यू झाला. प्राथमिक तपासात ट्रेलरचालक राजीवकुमार विजयशंकर याने वाहन भरधाव व निष्काळजीपणे चालवल्याचे निष्पन्न झाले.