कोलंबो : टी-२० विश्वचषकात बुधवारी न्यूझीलंडने यजमान श्रीलंकेचा ६१ धावांनी पराभव करून सुपर-आठ फेरीत शानदार विजय नोंदवला. या विजयामुळे न्यूझीलंडचे स्पर्धेतील आव्हान कायम आहे. मात्र सलग दुसऱ्या पराभवामुळे श्रीलंकेला गाशा गुंडाळावा लागला आहे. ३२ धावा करण्यासह डावखुऱ्या फिरकीद्वारे ४ बळी मिळवणारा रचिन रवींद्र न्यूझीलंडच्या विजयाचा शिल्पकार ठरला.
कोलंबोच्या आर. प्रेमदासा स्टेडियमवर झालेल्या या लढतीत प्रथम फलंदाजी करताना न्यूझीलंडने २० षटकांत ७ बाद १६८ धावांपर्यंत मजल मारली. मुख्य म्हणजे एकवेळ ते ६ बाद ८४ अशा संकटात होते. मात्र कर्णधार मिचेल सँटनर (२६ चेंडूंत ४७ धावा) आणि कोल मॅकोन्ची (२३ चेंडूंत नाबाद ३१) यांनी सातव्या विकेटसाठी ८४ धावांची भागीदारी रचून किवी संघाला दीडशे धावांपलीकडे नेले. रचिन रवींद्र (३२), फिन (२३) यांनीही उपयुक्त योगदान दिले. श्रीलंकेसाठी महीष थिक्षणा व दुश्मंता चमीरा यांनी प्रत्येकी ३ बळी मिळवले.
लक्ष्याचा पाठलाग करताना श्रीलंकेचा संघ २० षटकांत ८ बाद १०७ धावांपर्यंतच पोहचू शकला. पहिल्याच षटकात पथुम निसांका शून्यावर बाद झाला व श्रीलंकेचा डाव घसरला. पॉवरप्लेमध्ये त्यांना २० धावाच करता आल्या. रवींद्रने मग मधल्या फळीला गुंडाळताना कर्णधार दसुन शनका (३), पवन रत्ननायके (१०), कुशल मेंडिस (११) यांचे बळी मिळवले. कामिंदू मेंडिस (३१) व दुनिथ वेल्लालागे (२९) यांनी काहीसा प्रतिकार केला. मात्र धावगती वाढत गेली व फिरकीपटू वर्चस्व मिळवत गेल्याने श्रीलंकेचे आव्हान संपुष्टात आले.
सुपर-आठ फेरीच्या दुसऱ्या गटातून इंग्लंडने उपांत्य फेरी गाठलेली आहे. आता दुसऱ्या स्थानासाठी न्यूझीलंड व पाकिस्तान यांच्यात चुरस असेल. न्यूझीलंड सध्या ३ गुणांसह दुसऱ्या, तर पाकिस्तान १ गुणासह तिसऱ्या क्रमांकावर आहे.