दोहा : कर्णधार तिलक वर्मा (११३ चेंडूंत १०७ धावा) आणि यष्टिरक्षक फलंदाज कुमार कुशाग्र (१०२ चेंडूंत ११७ धावा) यांच्या झंझावाती शतकांच्या जोरावर भारत-अ संघाने आशिया चषक रायझिंग स्टार्स ५० षटकांच्या स्पर्धेतील सलामीच्या सामन्यात नेपाळचा तब्बल ३०६ धावांनी धुव्वा उडवला. प्रथम फलंदाजी करताना भारताने ९ बाद ३३२ धावांचा डोंगर उभारला. प्रत्युत्तरात भारतीय वेगवान गोलंदाजांच्या भेदक माऱ्यासमोर नेपाळचा संपूर्ण संघ अवघ्या २६ धावांत गारद झाला.
नाणेफेक गमावल्यानंतर प्रथम फलंदाजीसाठी उतरलेल्या भारत-अ संघाची सुरुवात काहीशी अडखळती झाली. सुरुवातीच्या विकेट्स गमावल्यानंतर कर्णधार तिलक वर्मा आणि कुमार कुशाग्र यांनी डावाची जबाबदारी स्वीकारली. दोघांनी आक्रमक फलंदाजी करत नेपाळच्या गोलंदाजांवर दबाव निर्माण केला.
या जोडीने तिसऱ्या विकेटसाठी तब्बल २०६ धावांची भागीदारी केली. तिलकने ११३ चेंडूंत सहा चौकार आणि चार षटकारांच्या मदतीने १०७ धावा केल्या. कुशाग्रने त्याच्याही पुढे जात १०२ चेंडूंत १० चौकार आणि पाच षटकारांसह ११७ धावांची धमाकेदार खेळी केली. डावाच्या अखेरीस सूर्यांश शेडगेने आक्रमक फलंदाजी करत अवघ्या १४ चेंडूंत नाबाद ३६ धावा फटकावल्या. त्यामुळे भारत ‘अ’ संघाला ५० षटकांत ९ बाद ३३२ धावांपर्यंत मजल मारता आली. नेपाळकडून डावखुरा फिरकीपटू ललित राजबंशी आणि लेगस्पिनर संदीप लामिछाने यांनी प्रत्येकी तीन विकेट्स घेतल्या. नंदन यादवने दोन विकेट्स मिळवल्या.
३३३ धावांच्या मोठ्या लक्ष्याचा पाठलाग करताना नेपाळच्या फलंदाजांची भारतीय वेगवान गोलंदाजांसमोर अक्षरशः दाणादाण उडाली. हर्षित राणा आणि प्रिन्स यादव यांनी नव्या चेंडूवर स्विंग आणि वेगाचा प्रभावी वापर करत नेपाळच्या फलंदाजीला खिंडार पाडले. हर्षितने १६ धावांत चार विकेट्स घेतल्या, तर प्रिन्स यादवने अवघ्या सहा धावा देत पाच फलंदाजांना माघारी धाडले. दोघांनी मिळून नेपाळचे नऊ फलंदाज बाद केले.
नेपाळच्या डावातील पहिली विकेट एकही धाव न होता पडली. डावाच्या तिसऱ्या चेंडूवर हर्षित राणाने अर्जुन कमालला पायचीत पकडले. त्यानंतर विकेट्सची मालिका सुरूच राहिली. सातव्या षटकात नेपाळची अवस्था ५ बाद १७ अशी झाली होती. भारतीय गोलंदाजांच्या माऱ्यासमोर नेपाळच्या एकाही फलंदाजाला दुहेरी धावसंख्या गाठता आली नाही. अखेर नेपाळचा संपूर्ण संघ ११.३ षटकांत अवघ्या २६ धावांवर बाद झाला.
डावखुरा फिरकीपटू शाहबाज अहमदनेही एक विकेट मिळवली. भारतीय गोलंदाजांच्या वर्चस्वामुळे कर्णधार तिलक वर्माला अन्य गोलंदाजांना संधी देण्याचीही गरज भासली नाही. या विजयासह भारत-अ संघाने स्पर्धेची सुरुवात दणक्यात केली. फलंदाजांच्या शतकांनंतर गोलंदाजांनीही केलेल्या विक्रमी कामगिरीमुळे भारताने नेपाळला मोठ्या फरकाने पराभूत केले. आता रविवारी भारताची पाकिस्तानशी गाठ पडेल.
भारताचा हा लिस्ट-ए क्रिकेटमधील दुसऱ्या क्रमांकाचा सर्वात मोठा विजय ठरला. नेपाळच्या एकाही फलंदाजाने दोन आकडी धावसंख्या गाठली नाही.
लिस्ट-ए क्रिकेटमध्ये नेपाळने (२६ ऑल आऊट) पाचव्या क्रमांकाची निचांकी धावसंख्या नोंदवली. वेस्ट इंडिजच्या १९ वर्षांखालील संघावर एकदिवसीय प्रकारात १८ धावांचा निचांक आहे.