नवी दिल्ली : दुखापतग्रस्त ऋषभ पंतच्या जागी यष्टीरक्षक फलंदाज कुमार कुशाग्राची न्यूझीलंड दौऱ्यातील पहिल्या दोन सामन्यांसाठी भारताच्या ‘अ’ संघात निवड करण्यात आली असल्याची माहिती बीसीसीआयने सोमवारी दिली.
इराणी करंडक स्पर्धेत शेष भारत संघाचे नेतृत्व करताना पंतच्या डाव्या बाजूच्या स्नायूंना दुखापत झाली. त्यामुळे त्याला पहिल्या दोन सामन्यांमधून बाहेर राहावे लागले आहे. तंदुरुस्तीच्या अधीन राहून उपलब्ध असणारा हा यष्टीरक्षक-फलंदाज सध्या बीसीसीआयच्या वैद्यकीय पथकाच्या देखरेखीखाली असून त्याची प्रकृती सुधारत आहे. तिसऱ्या सामन्यातील त्याच्या सहभागाबाबतचा निर्णय योग्य वेळी घेतला जाईल, असे बीसीसीआयने आपल्या निवेदनात स्पष्ट केले आहे. पंतची दुखापत सुरुवातीला वाटली होती त्यापेक्षा अधिक गंभीर असल्याचे दिसून येत आहे.
या घडामोडीनंतर पुरुष निवड समितीने पहिल्या दोन सामन्यांसाठी कुशाग्राची निवड केली आहे. न्यूझीलंड दौऱ्यावरील ‘अ’ संघाचे नेतृत्व ध्रुव जुरेल करणार असून, तोच यष्टीरक्षणाची धुराही सांभाळणार आहे. या संघात यशस्वी जैस्वाल, के. एल. राहुल, वॉशिंग्टन सुंदर, देवदत्त पडिक्कल आणि साई सुदर्शन या खेळाडूंचाही समावेश आहे.