नागपूर : सलामीवीर अथर्व तायडेने (२४४ चेंडूंत १०९ धावा) हंगामातील दुसरे व प्रथम श्रेणी कारकीर्दीतील तिसरे शतक साकारले. त्यामुळे विदर्भाने कर्नाटकविरुद्धच्या उपांत्यपूर्व सामन्यात ८६ षटकांत ३ बाद २६१ धावा केल्या आहेत. या सामन्यात ध्रुव शोरे (१२) लवकर माघारी परतला. मात्र अथर्व व यश राठोड (९३) यांनी दुसऱ्या विकेटसाठी तब्बल १८४ धावांची भागीदारी रचली. यशला शतकाने हुलकावणी दिली. अथर्वने मात्र १६ चौकार व १ षटकारासह शतकाची वेस ओलांडली. खेळ संपायला ७ षटके शिल्लक असताना अथर्व बाद झाला. दिवसअखेर करुण नायर ३०, तर कर्णधार अक्षय वाडकर २ धावांवर खेळत आहे. याव्यतिरिक्त, सौराष्ट्र-तमिळनाडू, मध्य प्रदेश-आंध्र प्रदेश यांच्यातही उपांत्यपूर्व लढती सुरू आहेत.