बदलापूर : बदलापूर रेल्वे स्थानक येथे प्रवाशांसाठी महत्त्वपूर्ण बदल करण्यात आला असून, कर्जतच्या दिशेने जाणाऱ्या लोकल गाड्यांचा थांबा तीन डबे मागे करण्यात येणार आहे. यामुळे प्रवाशांनी योग्य ठिकाणी उभे राहून लोकल पकडण्याचे आवाहन रेल्वे प्रशासनाने केले आहे.
प्लॅटफॉर्म क्रमांक २ वर दीर्घकाळ प्रलंबित असलेल्या शेड उभारणीच्या कामाला अखेर सुरुवात होत आहे. त्यामुळे कर्जतच्या दिशेने जाणाऱ्या लोकल गाड्या आता तीन डबे मागे थांबणार आहेत. हे काम एमआरव्हीसी यांच्या माध्यमातून राबवले जात असून, कर्जत बाजूकडील फूटओव्हर ब्रिजपासून प्लॅटफॉर्मवरील डेकपर्यंत शेड उभारण्यात येणार आहे.
अनेक वर्षांपासून प्रलंबित असलेली ही मागणी पूर्ण होत असल्याने प्रवाशांमध्ये समाधान व्यक्त होत आहे. पावसाळ्यापूर्वी शेड उभारणीचे काम पूर्ण करण्याचे लक्ष्य ठेवण्यात आले आहे.