उल्हासनगर : खडेगोळवली येथील गंगाविहार कॉलनीतून बुधवारी दुपारी गुन्हे शाखेने केलेल्या धडक कारवाईत एका २७ वर्षीय बांगलादेशी महिलेला अटक करण्यात आली आहे. ही महिला गेल्या सहा महिन्यांपासून कल्याणमध्ये राहत होती, तर त्याआधी ती मुंबईतील विविध भागांत वास्तव्य करत होती, अशी माहिती पोलिसांनी दिली आहे.

गुन्हे शाखेचे वरिष्ठ पोलीस निरीक्षक अशोक कोळी यांनी दिलेल्या माहितीनुसार, या महिलेबाबत मिळालेल्या गुप्त माहितीनंतर ही कारवाई करण्यात आली. 'महिला गंगाविहार कॉलनीत लपून राहत असल्याचे आम्हाला समजले होते. त्यानंतर या ठिकाणी सापळा रचून तिला ताब्यात घेण्यात आले,' असे कोळी यांनी सांगितले. गेल्या महिनाभरात उल्हासनगर आणि आजूबाजूच्या परिसरातून आतापर्यंत सात बांगलादेशी नागरिकांना अटक करण्यात आली आहे. या सर्वांवर परदेशी नागरिक कायदा व इतर संबंधित कलमांखाली गुन्हे दाखल करण्यात आले आहेत.