नवी दिल्ली : विदेशातील बाजारातील मजबूत कल आणि ज्वेलर्सच्या ताज्या मागणीमुळे गुरुवारी राष्ट्रीय राजधानीत सोन्याचा भाव ५०० रुपयांनी वाढून ७४,१०० रुपये प्रति १० ग्रॅम झाला. बुधवारी या मौल्यवान धातूचा भाव ७३,६०० रुपये प्रति १० ग्रॅमवर बंद झाला होता.
ऑल इंडिया सराफा असोसिएशनच्या म्हणण्यानुसार, औद्योगिक युनिट्स आणि नाणे निर्मात्यांकडून मागणी वाढल्यामुळे गुरुवारी चांदी १ हजार रुपयांनी वाढून ८४,६०० रुपये प्रति किलोग्रॅमवर पोहोचली. मागील व्यवहारात हा दर ८३,६०० रुपये प्रति किलो होता. याशिवाय ९९.५ टक्के शुद्ध सोन्याचा भाव ५०० रुपयांनी वाढून ७३,२५० रुपयांवरून ७३,७५० रुपये प्रति १० ग्रॅम झाला. परदेशात कॉमेक्स सोन्याचा भाव ०.८२ टक्क्यांनी वाढून २,५४६.८० डॉलर प्रति औंस झाला. तर आंतरराष्ट्रीय बाजारात चांदीची किंमत २९.०७ डॉलर प्रति औंसवर आहे.
एचडीएफसी सिक्युरिटीजमधील कमोडिटीजचे वरिष्ठ विश्लेषक सौमिल गांधी यांनी सांगितले की, अमेरिकेच्या अपेक्षेपेक्षा कमकुवत रोजगार आकडेवारीमुळे सराफा बाजारात गुरुवारी सोने-चांदी महागले. मोतीलाल ओसवाल फायनान्शिअल सिक्युरिटीज, कमोडिटी रिसर्चचे वरिष्ठ विश्लेषक मानव मोदी यांच्या मते, नोकऱ्यांच्या आकडेवारीनंतर, १८ सप्टेंबर रोजी फेडरलकडून व्याजदर कपातीची शक्यता वाढवली आहे.
