नवी दिल्ली : जागतिक बाजारात मौल्यवान धातूंच्या दरात घसरण झाल्याने सोमवारी राष्ट्रीय राजधानीत सोन्याचा भाव ७०० रुपयांनी घसरून ७३,५०० रुपये प्रति १० ग्रॅम झाला. शुक्रवारी हा दर ७४,२०० रुपये प्रति १० ग्रॅम होता. अखिल भारतीय सराफा असोसिएशनच्या म्हणण्यानुसार, औद्योगिक युनिट्स आणि नाणे निर्मात्यांच्या कमी मागणीमुळे सोमवारी सोन्याचा मागोवा घेत चांदीचे भाव २ हजार रुपये प्रति किलोग्रामने घसरून ८३,८०० रुपये झाले. मागील सत्रात चांदीचा भाव ८५,८०० रुपये प्रति किलो होता. दरम्यान, ९९.५ टक्के शुद्धतेच्या सोन्याचा भावही ५०० रुपयांनी घसरून ७३,८५० रुपयांवरून ७३,३५० रुपये प्रति १० ग्रॅम झाला.
जागतिक स्तरावर कॉमेक्स सोने ०.०७ टक्क्यांनी घसरून २,५२२.९० अमेरिकन डॉलर प्रति औंसवर व्यवहार करत होते. मात्र, आंतरराष्ट्रीय बाजारात चांदीचा भाव किरकोळ वाढून २८.४४ डॉलर प्रति औंस होता, असे एचडीएफसी सिक्युरिटीजमधील कमोडिटीजचे वरिष्ठ विश्लेषक सौमिल गांधी यांनी सांगितले.
