नवी दिल्ली : भारतीय उत्पादन क्षेत्राने ऑगस्टमध्ये १७ वर्षांहून अधिक काळातील उत्तम कामगिरी केली. मागणीतील तेजी आणि जलद उत्पादन कार्यक्षमतेचा लाभ उत्पादन क्षेत्राला झाला, असे सोमवारी एका मासिक अहवालात म्हटले आहे.
हंगामी समायोजित एचएसबीसी इंडिया मॅन्युफॅक्चरिंग परचेसिंग मॅनेजर्स इंडेक्स (पीएमआय) जुलैमधील ५९.१ वरून ऑगस्टमध्ये ५९.३ वर पोहोचला, जो गेल्या १७ वर्षांतील ऑपरेटिंग परिस्थितीत सर्वात जलद सुधारणा दर्शवितो. परचेसिंग मॅनेजर्स इंडेक्स (पीएमआय) च्या भाषेत, ५० पेक्षा जास्त प्रिंट म्हणजे विस्तार, तर ५० पेक्षा कमी स्कोअर म्हणजे आकुंचन.
भारताचा उत्पादन पीएमआय ऑगस्टमध्ये आणखी एक नवीन उच्चांक गाठला, जो उत्पादनात जलद वाढ झाल्यामुळे झाला. भारतीय वस्तूंवरील अमेरिकेच्या शुल्कात ५० टक्क्यांपर्यंत वाढ झाल्यामुळे नवीन निर्यात ऑर्डरच्या वाढीमध्ये थोडीशी घट झाली असावी, कारण अमेरिकन खरेदीदार टॅरिफ अनिश्चिततेच्या काळात ऑर्डर देण्यापासून परावृत्त होतात, असे एचएसबीसीचे मुख्य भारतीय अर्थशास्त्रज्ञ प्रांजुल भंडारी म्हणाले.
भारतातील वस्तूंवर ५० टक्के इतका मोठा यूएस टॅरिफ २७ ऑगस्टपासून लागू झाला. जगातील सर्वाधिक टॅरिफमध्ये रशियाकडून कच्चे तेल खरेदी करण्यासाठी २५ टक्के दंडाचा समावेश आहे.
आकडेवारीनुसार भारतीय उत्पादकांकडे दिलेल्या आंतरराष्ट्रीय ऑर्डरमध्ये सौम्य वाढ दिसून आली. ही वाढ गेल्या पाच महिन्यांतील सर्वात कमकुवत होती, जरी ऐतिहासिक मानकांनुसार उत्तम होती. कंपन्यांनी आशिया, युरोप, मध्य पूर्व आणि अमेरिकेतील ग्राहकांकडून नवीन काम मिळवल्याचे दिसते.
नवीन ऑर्डर जुलैमध्ये मोठ्या प्रमाणात वाढल्या
दरम्यान, येणाऱ्या नवीन ऑर्डर जुलैमध्ये मोठ्या प्रमाणात वाढल्या, जी ५७ महिन्यांतील सर्वात वेगवान होती. मागणीतील तेजी व्यतिरिक्त, सर्वेक्षण सहभागींनी जाहिरातींच्या यशाशी वाढीचा संबंध जोडला. दुसरीकडे, एकूण ऑर्डर्सची वाढ बरीच चांगली राहिली. देशांतर्गत ऑर्डर्स मजबूत राहिल्याचे दिसते. त्यामुळे अर्थव्यवस्थेवरील टॅरिफ-संबंधित परिणशम कमी होण्यास मदत झाली. भविष्यातील उत्पादनाबद्दल उत्पादकांचा सततचा आशावाद हा एक सकारात्मक संकेत आहे, असे भंडारी म्हणाले.
अतिरिक्त साहित्य खरेदीचा वेग वाढवला, अधिक नोकऱ्या निर्माण
सर्वेक्षणानुसार, ऑगस्टमध्ये कंपन्यांनी अतिरिक्त साहित्य खरेदी करण्याचा वेग वाढवला आणि अधिक नोकऱ्या निर्माण झाल्याने भविष्यातील सकारात्मक अपेक्षांचे अंशतः प्रतिबिंब पडते.सर्वात मजबूत विक्री आणि उत्पादन कामगिरी मध्यवर्ती वस्तू श्रेणीमध्ये नोंदवली गेली, त्यानंतर भांडवली आणि नंतर ग्राहकोपयोगी वस्तू यांचा क्रमांक लागतो. रोजगाराच्या बाबतीत, अहवालात म्हटले आहे की ऑगस्टमध्ये सलग १८ व्या महिन्यात रोजगार वाढला. नोव्हेंबर २०२४ नंतरचा सर्वात कमकुवत दर असूनही, रोजगार निर्मितीचा वेग ऐतिहासिकदृष्ट्या मजबूत होता कारण उत्पादकांना विश्वास होता की येत्या १२ महिन्यांत उत्पादन वाढेल. एचएसबीसी इंडिया मॅन्युफॅक्चरिंग पीएमआय एस अँड पी ग्लोबलने सुमारे ४०० उत्पादकांच्या पॅनेलमधील खरेदी व्यवस्थापकांना पाठवलेल्या प्रश्नावलींच्या उत्तरांमधून संकलित केला आहे.
