मुंबई : अमेरिकन डॉलरच्या तुलनेत रुपया ५५ पैशांनी कोसळून ८७.१७ या सर्वकालीन नीचांकी पातळीवर बंद झाला. सोमवारी इंटरबँक फॉरेक्स मार्केटमध्ये रुपया ८७ च्या कमकुवत पातळीवर उघडला आणि सत्रादरम्यान अमेरिकन चलनाच्या तुलनेत ८७.२९ च्या दिवसभराच्या नीचांकी पातळीवर पोहोचला. दिवसअखेरीस स्थानिक युनिट शेवटी ८७.१७ या नव्या नीचांकी पातळीवर स्थिरावला. मागील बंदच्या तुलनेत रुपया तब्बल ५५ पैशांनी कोसळला. शुक्रवारी अमेरिकन चलनाच्या तुलनेत रुपया ८६.६२ वर बंद झाला होता.
दरम्यान, सहा चलनांच्या तुलनेत डॉलरची ताकद मोजणारा डॉलर निर्देशांक १.०१ टक्क्यांनी वाढून १०९.४६ वर व्यवहार करत होता.
२०२५ मध्ये, ३१ डिसेंबर २०१४ रोजी भारतीय रुपयाच्या पातळीवरून तब्बल १.८ टक्क्यांनी घसरून २०२५ मध्ये ८५.६१ डॉलरच्या पातळीवर पोहोचला. तेल आयातदारांकडून डॉलरची सततची मागणी, विदेशी गुंतवणूक संस्थांकडून सतत निधी काढून घेण्यात येत असल्याने रुपया कमजोर होत राहात असल्याने आणि विदेशी बाजारात अमेरिकन चलन सशक्त होत असल्याच्या पार्श्वभूमीवर रुपयाला सतत दबावाचा सामना करावा लागला.
विदेशी संस्थात्मक गुंतवणूकदारांनी शनिवारी भांडवली बाजारात निव्वळ आधारावर रु. १,३२७.०९ कोटी रुपयांच्या समभागांची विक्री केली. दरम्यान, २४ जानेवारी रोजी संपलेल्या आठवड्यात भारताची विदेशी गंगाजळी ५.५७४ अब्ज अमेरिकन डॉलरने वाढून ६२९.५५७ अब्ज डॉलर झाला आहे, असे रिझर्व्ह बँकेने शुक्रवारी सांगितले.
मागील रिपोर्टिंग आठवड्यात, एकूण विदेशी गंगाजळी १.८८८ अब्ज डॉलरने घसरून ६२३.९८३ अब्ज डॉलर झाली होती. गेल्या काही आठवड्यांपासून गंगाळीत घसरण होत आहे आणि रुपयातील अस्थिरता कमी करण्यासाठी भारतीय रिझर्व्ह बँक (आरबीआय) च्या विदेशी चलन बाजारातील हस्तक्षेपानंतरही रुपयाची घसरण सुरूच आहे.
