सलग तीन महिन्यांच्या घसरणीनंतर घाऊक महागाई दरात किरकोळ वाढ

नवी दिल्ली : सलग तीन महिन्यांच्या घसरणीनंतर भाजीपाला तेल आणि पेये यासारखे उत्पादित खाद्यपदार्थ महागल्यामुळे फेब्रुवारीमध्ये घाऊक महागाई दर किरकोळ वाढून २.३८ टक्क्यांवर पोहोचला आहे, अशी सरकारी आकडेवारी सोमवारी जाहीर करण्यात आली आहे. घाऊक किंमत निर्देशांक (डब्ल्यूपीआय) आधारित महागाईचा दर जानेवारीमध्ये २.३१ टक्के होता. फेब्रुवारी २०२४ मध्ये तो ०.२ टक्के होता.

वाणिज्य आणि उद्योग मंत्रालयाने जारी केलेल्या निवेदनानुसार, फेब्रुवारी २०२५ मध्ये घाऊक महागाईच्या दरात वाढ होण्याचे प्रमुख कारण म्हणजे अन्न उत्पादने, खाद्यपदार्थ, इतर उत्पादन, बिगर-खाद्य वस्तू आणि कापड निर्मिती इत्यादींच्या किमतींमध्ये वाढ झाली आहे.

आकडेवारीनुसार, उत्पादित खाद्यपदार्थांची महागाई ११.०६ टक्क्यांनी, वनस्पती तेलात ३३.५९ टक्क्यांनी, तर शीतपेयांत किरकोळ वाढ म्हणजे १.६६ टक्क्यांपर्यंत वाढ झाली. एकंदरीत, फेब्रुवारीमध्ये उत्पादित उत्पादनांच्या निर्देशांकात ०.४२ टक्क्यांनी वाढ झाली आहे.

तथापि, बटाट्याचे भाव ७४.२८ टक्क्यांवरून २७.५४ टक्क्यांवर घसरल्याने भाज्यांचे भाव काही प्रमाणात घसरले. याशिवाय दुधाचे दर मागील महिन्यात ५.४० टक्क्यांवरून १.५८ टक्क्यांवर आले आहेत. फळे आणि कांद्याचे भाव अनुक्रमे २० टक्के आणि ४८.५ टक्के महागाईसह अजूनही उच्च पातळीवर आहेत. तसेच इंधन आणि उर्जा श्रेणीत फेब्रुवारीमध्ये ०.७१ टक्क्यांची घसरण झाली आहे, जी मागील महिन्यात २.७८ टक्के होती.

बुधवारी जाहीर झालेल्या किरकोळ महागाईच्या आकडेवारीवरून असे दिसून आले की खाद्यपदार्थांच्या किमती कमी झाल्याने ग्राहक किंमत निर्देशांक (सीपीआय) आधारित किरकोळ महागाई दर फेब्रुवारीमध्ये ३.६१ टक्क्यांच्या सात महिन्यांच्या नीचांकी पातळीवर आला आहे.

सलग तीन महिन्यांच्या घसरणीनंतर घाऊक महागाई दरात किरकोळ वाढ दिसून आली.

‘इक्रा’चे वरिष्ठ अर्थतज्ज्ञ राहुल अग्रवाल यांच्या मते, इंधन आणि ऊर्जा विभागातील महागाई दर घसरली असताना कोर (नॉन-फूड मॅन्युफॅक्चरिंग) घाऊक महागाई दर २४ महिन्यांच्या उच्चांकी १३ टक्क्यांपर्यंत वाढल्याने त्याची भरपाई केली गेली.

ते म्हणाले, पिकाचे उत्तम उत्पादन आणि वाढीव आधार यामुळे नजीकच्या काळात घाऊक महागाई दर - अन्नपदार्थांच्या महाागाईत आणखी घसरण होण्याची अपेक्षा आहे, परंतु सामान्य तापमानापेक्षा जास्त तापमानामुळे अन्नधान्याच्या महागाईचा धोका वाढतो, असेही त्यांनी नमूद केले. एकंदरीत, इक्राची अपेक्षा आहे की, घाऊक महागाई दर २०२५-२६ या आर्थिक वर्षात सरासरी २.५-३ टक्के राहील.