कॉँग्रेसच्या 'मत चोरी' मोहिमेमध्ये आपला कोणताही सहभाग नसल्याचे बॉलीवूड अभिनेता के. के. मेनन याने स्पष्ट केले आहे. कॉँग्रेसने 'मत चोरी' या मोहिमेचा व्हिडिओ सोशल मीडियावर प्रसिद्ध केला. या व्हिडिओमध्ये के के मेननची एक लहानशी क्लिप असून कॉँग्रेसचा हा व्हिडिओ व्हायरल झाल्यानंतर त्याने या संदर्भात सोशल मीडियावर प्रतिक्रिया दिली आहे.
काँग्रेसच्या ‘मत चोरी’ मोहिमेतील व्हिडिओ
काँग्रेसच्या ‘मत चोरी’ मोहिमेचा एक व्हिडिओ त्यांनी आपल्या अधिकृत इन्स्टाग्राम हँडलवर पोस्ट केला आहे. या व्हिडिओच्या सुरुवातीला के. के. मेनन दिसतात आणि लोकांचं लक्ष वेधण्यासाठी म्हणतात, "अरे थांबा-थांबा यार, स्क्रोल करणं थांबवा, जर तुम्ही ही रील पाहत असाल तर..." त्यानंतर दुसरा व्यक्ती मोहिमेत सहभागी होण्याचं आवाहन करताना दिसतो. कॅप्शनमध्ये लोकांना लिंक व नंबर देऊन फॉर्म भरायला आणि कॉल करण्याचं आवाहन व्हिडिओमध्ये केले आहे.
“मी या जाहिरातीत काम केलं नाही” - के. के. मेनन
हा व्हिडिओ पाहून अनेकांना वाटलं की के. के. मेनन काँग्रेसच्या या मोहिमेत आहेत. पण मेनन यांनी लगेचच पोस्टच्या कमेंट सेक्शनमध्ये स्पष्टीकरण देत लिहिलं - "कृपया लक्षात घ्या, मी या जाहिरातीत अभिनय केलेला नाही. माझ्या ‘स्पेशल ऑप्स’ प्रमोशनमधील एक क्लिप एडिट करून, माझ्या परवानगीशिवाय या मोहिमेत वापरली गेली आहे."
इनस्टाग्रामवरील हा व्हिडिओ जरी काँग्रेसच्या 'मत चोरी' मोहिमेचा भाग असला, तरी के. के. मेनन यांच्या म्हणण्यानुसार त्यांचा या मोहिमेशी काहीही संबंध नाही.
