ज्येष्ठ अभिनेते नाना पाटेकर यांचं ८ ऑक्टोबर रोजी गोव्यात हृदयविकाराच्या झटक्याने निधन झालं. ते ७५ वर्षांचे होते. त्यांच्या निधनानंतर अभिनेत्री तनुश्री दत्ताने केलेल्या वक्तव्यांमुळे पुन्हा एकदा जुन्या वादाला तोंड फुटलं आहे. तनुश्रीने सोशल मीडियावर नानांबद्दल नाराजी व्यक्त करत काही गंभीर आरोप केले होते. तिच्या या वक्तव्यांवर आता नाना पाटेकर यांचा मुलगा मल्हार पाटेकरने पहिल्यांदाच प्रतिक्रिया दिली आहे. कोणाचंही नाव न घेता त्याने या प्रकरणावर आपली भूमिका मांडली. तसेच, वडिलांच्या निधनानंतर कुटुंबावर काय परिस्थिती ओढवली आणि नानांसोबतचे संबंध कसे होते, याबाबतही तो मनमोकळेपणाने बोलला.
'जे सत्य आहे, ते सत्यच राहणार'
'हिंदुस्तान टाइम्स'ला दिलेल्या मुलाखतीत मल्हार पाटेकर म्हणाला, "मला कोणाचंही नाव घ्यायचं नाही. पण लोक विनाकारण ज्या प्रकरणाबद्दल पुन्हा बोलत आहेत, ते प्रकरण आधीच संपलं आहे. न्यायव्यवस्थेने त्यांना दोषमुक्त केलं आहे. प्रकरण संपलं असतानाही काही लोक त्याबद्दल बोलत आहेत. अशा लोकांना मला काहीही सांगायचं नाही. जे सत्य आहे, ते सत्यच राहणार. देव त्यांचं भलं करो."
तनुश्री दत्ताने नेमकं काय म्हटलं होतं?
नाना पाटेकर यांच्या निधनानंतर तनुश्री दत्ताने सोशल मीडियावर 'दुष्ट व्यक्तीचं निधन' अशा आशयाची पोस्ट केली होती. त्यानंतर तिने २०१८ मधील MeToo प्रकरणामुळे आपल्याला अनेक अडचणींचा सामना करावा लागल्याचंही सांगितलं.
तनुश्रीने २००९ मधील 'हॉर्न ओके प्लीज' चित्रपटाच्या सेटवर नाना पाटेकर यांच्यावर लैंगिक छळाचे आरोप केले होते. नानांनी हे आरोप फेटाळले होते. या प्रकरणी २०१८ मध्ये गुन्हा दाखल झाला होता. मात्र, पुरेशा पुराव्यांअभावी २०१९ मध्ये पोलिसांनी प्रकरण बंद केलं होतं.
'बाबा कधीच एकटे नव्हते'
याच मुलाखतीत मल्हारने आपल्या आई-वडिलांच्या नात्याबद्दलही भाष्य केलं. तो म्हणाला, "आम्ही सोशल मीडियावर कुटुंबाचे फोटो टाकत नाही, याचा अर्थ आमच्यात जवळीक नव्हती असा होत नाही. आई-बाबा वेगळे राहत असले तरी त्यांच्यात चांगले संबंध होते. त्यांचं ३८ ते ३९ वर्षांचं नातं होतं."
नाना पाटेकर एकटे राहत होते किंवा आजारी होते, अशा चर्चाही मल्हारने फेटाळल्या. "बाबा कधीच एकटे नव्हते. कुटुंबातील कोणीतरी नेहमी त्यांच्यासोबत असायचं. ते अतिशय तंदुरुस्त होते. दररोज अडीच तास व्यायाम करायचे. अनेक तरुणांनाही इतका व्यायाम जमणार नाही," असं त्याने सांगितलं.
'आईचा फोन आला आणि जगच थांबल्यासारखं वाटलं'
वडिलांच्या निधनाचा दिवस आठवताना मल्हार भावुक झाला. नाना त्यावेळी गोव्यात होते, तर मल्हार पुण्यात होता. पहाटे पाचच्या सुमारास आईचा फोन आला आणि वडिलांच्या निधनाची बातमी समजली. "त्यानंतर नेमकं काय झालं, हे मला आठवतही नाही. माझ्या आजूबाजूचं संपूर्ण जगच थांबल्यासारखं वाटलं," अशा शब्दांत त्याने भावना व्यक्त केल्या.
दरम्यान, नाना पाटेकर यांना अलीकडच्या काळात चित्रपटांपेक्षा सामाजिक कार्यात अधिक रस होता. काश्मीरमध्ये शाळा सुरू करण्यासाठी आणि शेतकऱ्यांच्या मदतीसाठी ते काम करत होते. या कामातून त्यांना आनंद आणि समाधान मिळत होतं. आता वडिलांचं हे सामाजिक कार्य पुढे नेण्याची जबाबदारी आपली असल्याचं मल्हारने सांगितलं.
