बंगळुरू : प्रसिद्ध गायक सोनू निगम पुन्हा एकदा चर्चेत आला आहे. मात्र, यावेळी त्याच्या गाण्यामुळे नाही, तर माफी मागणाऱ्या व्हिडीओमुळे! गेल्या वर्षी बंगळुरूमधील एका कार्यक्रमात कन्नड गाण्याची मागणी करणाऱ्या प्रेक्षकांवर नाराजी व्यक्त करताना सोनूने पहलगाम दहशतवादी हल्ल्याचा उल्लेख केला होता. त्यावरून मोठा वाद निर्माण झाला होता. आता बंगळुरूमध्ये पुन्हा कार्यक्रम होणार असल्याने हा वाद उफाळून आला. अखेर सोनूने सोशल मीडियावर व्हिडीओ शेअर करत कर्नाटकातील जनतेची माफी मागितली आहे. गरज पडल्यास हजार वेळा सॉरी म्हणायलाही तयार असल्याचं त्याने म्हटलं आहे.
नेमकं काय म्हणाला सोनू निगम?
सोनू निगमने कर्नाटक रक्षणा वेदिकेचे (केआरव्ही) प्रदेशाध्यक्ष टी. ए. नारायण गौडा यांच्याशी चर्चा केल्यानंतर माफीचा व्हिडीओ प्रसिद्ध केला. या व्हिडीओमध्ये त्याने कर्नाटकातील जनतेला आपलं कुटुंब म्हटलं आहे.
"आपण एखाद्यावर प्रेम करत असू आणि ते नातं कायम टिकावं असं वाटत असेल, तर हजार वेळा सॉरी म्हणायलाही हरकत नसते. माझ्या बोलण्यामुळे नकळत तुमच्या भावना दुखावल्या असतील, तर मी मनापासून माफी मागतो. मी कधीही कुणाचं मन दुखावणारा माणूस नाही. विशेषतः कर्नाटकातील माझ्या कुटुंबीयांचं मन दुखावण्याचा माझा कधीच हेतू नव्हता. गेल्या ३० वर्षांत तुम्ही मला भरभरून प्रेम आणि आदर दिला आहे. एखाद्या छोट्याशा गैरसमजामुळे आपल्या नात्यात कटुता निर्माण व्हावी किंवा या नात्याला तडा जावा, असं मला अजिबात वाटत नाही," असं सोनू निगमने व्हिडीओमध्ये म्हटलं आहे.
नेमका वाद काय?
एप्रिल २०२५ मध्ये बंगळुरूमधील ईस्ट पॉइंट इंजिनिअरिंग कॉलेजमध्ये सोनू निगमचा कार्यक्रम आयोजित करण्यात आला होता. त्यावेळी प्रेक्षकांमधील काही तरुणांनी कन्नड गाणं गाण्याची मागणी केली. मात्र, ही मागणी करण्याची पद्धत आक्रमक आणि धमकीवजा वाटल्याचं सोनूने सांगितलं होतं. त्यावर प्रतिक्रिया देताना त्याने पहलगाम दहशतवादी हल्ल्याचा उल्लेख केला. या हल्ल्यात २६ जणांचा मृत्यू झाला होता.
कन्नड गाण्याच्या मागणीचा पहलगाम हल्ल्याशी संबंध जोडल्याने कर्नाटकात संताप व्यक्त करण्यात आला. कन्नडप्रेमी संघटनांनी सोनूवर टीका केली. बंगळुरूमधील अवलाहल्ली पोलीस ठाण्यात त्याच्याविरोधात गुन्हाही दाखल झाला. काही कन्नड चित्रपटांमधील त्याची गाणी वगळण्यात आल्याचंही वृत्त होतं.
यापूर्वीही मागितली होती माफी
वाद वाढल्यानंतर सोनूने आपलं वक्तव्य संपूर्ण कन्नड समाजाविरोधात नव्हतं, तर कार्यक्रमात आक्रमकपणे मागणी करणाऱ्या काही तरुणांबद्दल होतं, असं स्पष्टीकरण दिलं होतं. त्याने यापूर्वीही सोशल मीडियावर माफी मागत कर्नाटकावरील आपलं प्रेम अहंकारापेक्षा मोठं असल्याचं म्हटलं होतं. मात्र, त्यानंतरही वाद पूर्णपणे शांत झाला नव्हता.
पुन्हा बंगळुरूमध्ये कार्यक्रम; विरोधाची भूमिका
येत्या शनिवारी, २४ ऑक्टोबर २०२६ रोजी बंगळुरूमधील भारतीय मॉल येथे सोनू निगमचा कार्यक्रम होणार आहे. या कार्यक्रमाच्या पार्श्वभूमीवर कर्नाटक रक्षणा वेदिकेने पुन्हा विरोध सुरू केला होता. संघटनेचे अध्यक्ष नारायण गौडा यांनी बंगळुरूच्या पोलीस आयुक्तांना पत्र लिहून सोनूच्या कार्यक्रमाला परवानगी देऊ नये, अशी मागणी केली होती. गेल्या वर्षीच्या वक्तव्यामुळे कन्नड भाषिकांच्या भावना दुखावल्याचा त्यांचा आरोप होता.
माफीनंतर आंदोलन मागे
दरम्यान, सोनू निगमने नारायण गौडा यांच्याशी चर्चा करून जाहीर माफी मागितल्यानंतर संघटनेने आपलं आंदोलन मागे घेतलं आहे. सोनू निगमविषयी कोणताही वैयक्तिक राग नसून, त्याच्या वक्तव्याला विरोध होता, असं गौडा यांनी स्पष्ट केलं. सोनूने यापुढेही कन्नड गाणी गावी आणि कर्नाटकात कार्यक्रम करावेत, अशी अपेक्षाही त्यांनी व्यक्त केली आहे.
