न्यूयॉर्कच्या महापौरपदाच्या निवडणुकीत विजयी ठरलेले झोहरान ममदानी आणि अमेरिकेचे राष्ट्राध्यक्ष डोनाल्ड ट्रम्प यांची नुकतीच व्हाइट हाऊसमध्ये महत्त्वपूर्ण भेट झाली. दोन्ही नेत्यांमधील ही पहिलीच औपचारिक बैठक असताना, एका पत्रकाराने ममदानी यांना विचारलेल्या एका प्रश्नाने सर्वांचे लक्ष वेधले.
बैठक संपल्यानंतर माध्यमांशी संवादादरम्यान एका पत्रकाराने ममदानी यांना थेटच विचारले, “आपण अजूनही ट्रम्प यांना फॅसिस्ट मानता का?” कारण निवडणूक प्रचारादरम्यान ममदानी यांनी ट्रम्प यांच्यावर टीका करताना ‘फॅसिस्ट’ हा शब्द वापरला होता. त्यामुळे या उत्तराकडे सर्वांचे लक्ष लागले होते. शिवाय, हा प्रश्न ट्रम्प यांच्यासमोरच विचारल्याने या उत्तराची उत्सुकता उपस्थितांना होती.
ममदानीऐवजी ट्रम्प यांनीच दिलं उत्तर
ममदानी उत्तर देण्यासाठी बोलू लागले, की “मी त्याबद्दल बोललो…” इतक्यात ट्रम्प यांनी त्यांना मध्येच थांबवत वातावरण हलके-फुलके केले. ट्रम्प हसतच म्हणाले, "ते सगळं ठीक आहे. फक्त ‘हो’ म्हणा, स्पष्टीकरण देण्यापेक्षा ते सोपं आहे. मला काही हरकत नाही." ममदानींचा हात थोपटत दिलेल्या ट्रम्प यांच्या प्रतिक्रियेमुळे उपस्थितांमध्ये हशा पिकला. गंभीर वातावरणाचे रूपांतर हास्यात झाले.
ट्रम्प-ममदानी भेटीत उपयुक्त चर्चा
ट्रम्प यांनी सकाळी झालेली बैठक अत्यंत उपयुक्त असल्याचे सांगितले. त्यांनी ममदानींचे विजयाबद्दल अभिनंदन करत म्हटले, “आमची भेट उत्कृष्ट झाली. दोघांनाही हे शहर प्रगती करावी असं वाटतं. हाऊसिंग, घरे बांधणी, अन्नाच्या किमती… अनेक मुद्द्यांवर आम्ही एकमत आहोत.”
ममदानींच्या कार्यकाळासाठी शुभेच्छा देताना ट्रम्प म्हणाले, मला वाटतं न्यूयॉर्कला एक खूप चांगला महापौर मिळाला आहे.
