चेहऱ्यावरील डाग, डोळ्यांखालील काळी वर्तुळं आणि त्वचेचा निस्तेजपणा कमी करण्यासाठी अनेकजण वेगवेगळे घरगुती उपाय करून पाहतात. महागड्या स्किन केअर उत्पादनांऐवजी घरात सहज उपलब्ध असलेल्या गोष्टींचा वापर करण्याकडेही अनेकांचा कल असतो. अशाच एका उपायाची सध्या चर्चा होत आहे, तो म्हणजे चेहऱ्यावर केळ्याचं साल रगडण्याचा! अभिनेत्री भाग्यश्रीने सोशल मीडियावर व्हिडीओ शेअर करत हा उपाय कसा करावा, याबद्दल माहिती दिली आहे. मात्र, केळ्याच्या सालीमुळे त्वचेवर नेमका काय परिणाम होतो आणि हा उपाय करताना कोणती काळजी घ्यावी, हे जाणून घेणंही महत्त्वाचं आहे.
भाग्यश्रीने सांगितला केळ्याच्या सालीचा उपाय
अभिनेत्री भाग्यश्रीने तिच्या इंस्टाग्राम अकाउंटवर एक व्हिडीओ शेअर केला आहे. या व्हिडीओमध्ये ती केळ्याच्या सालीच्या आतील बाजूने चेहऱ्यावर हलक्या हाताने मसाज करताना दिसते. केळी खाल्ल्यानंतर त्याचं साल फेकून देण्याऐवजी त्याचा त्वचेच्या निगेसाठी वापर करता येऊ शकतो, असं तिने या व्हिडीओतून सुचवलं आहे.
केळ्याच्या सालीमध्ये अँटीऑक्सिडंट्ससह काही जैविक सक्रिय घटक आढळतात. त्यामुळे त्वचेच्या निगेसाठी केळ्याच्या सालीचा वापर करण्याबाबत सांगितले जाते. मात्र, चेहऱ्यावरील काळी वर्तुळं, डाग किंवा सुरकुत्या कमी करण्यासाठी केळ्याचं साल किती प्रभावी आहे, याबाबत ठोस वैज्ञानिक पुरावे मर्यादित आहेत.
चेहऱ्यावर केळ्याचं साल लावल्याने काय होऊ शकतं?
१. त्वचा मऊ राहण्यास मदत
केळ्याच्या सालीच्या आतील बाजूने चेहऱ्यावर हलक्या हाताने मसाज केल्याने त्वचा काही काळ मऊ वाटू शकते. मात्र, त्वचेचा कोरडेपणा कमी करण्यासाठी योग्य मॉइश्चरायझर वापरणं अधिक प्रभावी ठरतं.
२. त्वचेचा तजेलदारपणा
केळ्याच्या सालीमध्ये फेनॉलिक घटक आणि इतर अँटीऑक्सिडंट्स आढळतात. हे घटक प्रयोगशाळेतील अभ्यासांमध्ये त्यांच्या संभाव्य गुणधर्मांसाठी ओळखले जातात. मात्र, केळ्याचं साल चेहऱ्यावर लावल्याने त्वचा उजळते, याला पुरेसा मानवी संशोधनाचा आधार उपलब्ध नाही.
३. डोळ्यांखालील काळी वर्तुळं
डोळ्यांखालील काळी वर्तुळं झोपेची कमतरता, आनुवंशिकता, वय आणि त्वचेतील बदल अशा अनेक कारणांमुळे दिसू शकतात. केळ्याचं साल रगडल्याने ही वर्तुळं कमी होतात, असं निश्चितपणे सांगता येत नाही. डोळ्यांच्या आसपासची त्वचा नाजूक असल्याने या भागात साल रगडणं टाळावं.
४. डाग आणि सुरकुत्या कमी होतात का?
चेहऱ्यावरील पिग्मेंटेशन किंवा बारीक रेषा कमी करण्यासाठी केळ्याच्या सालीचा वापर केला जातो. मात्र, या उपायामुळे डाग किंवा सुरकुत्या कमी होतात, याचे ठोस वैज्ञानिक पुरावे नाहीत. अशा समस्यांसाठी त्वचेच्या प्रकारानुसार योग्य उत्पादनांची निवड करणं आणि गरज असल्यास त्वचारोगतज्ज्ञांचा सल्ला घेणं फायदेशीर ठरतं.
केळ्याचं साल चेहऱ्यावर लावताना कोणती काळजी घ्यावी?
प्रत्येकाची त्वचा वेगवेगळी असते. त्यामुळे एखादा घरगुती उपाय सर्वांनाच सूट होईल असं नाही. केळ्याचं साल वापरायचं असल्यास आधी त्वचेच्या छोट्या भागावर चाचणी करा. लालसरपणा, खाज किंवा जळजळ जाणवल्यास त्याचा वापर थांबवा. चेहऱ्यावर साल जोरात रगडू नका आणि डोळ्यांच्या आसपासचा भाग टाळा.
लक्षात ठेवा : केळ्याचं साल हा त्वचेची काळजी घेण्याचा सिद्ध उपचार नाही. त्वचा उजळवण्यासाठी, डाग कमी करण्यासाठी किंवा सुरकुत्यांवर उपाय म्हणून केवळ या घरगुती पद्धतीवर अवलंबून राहू नका. त्वचेच्या आरोग्यासाठी नियमित मॉइश्चरायझर, सनस्क्रीन आणि योग्य स्किन केअर रुटीन अधिक महत्त्वाचं आहे.
