चामखीळ (Skin Tag) हा एक सामान्य पण अनेकदा दुर्लक्षित केला जाणारा त्वचारोग आहे. चामखीळ फारसा वेदनादायक नसला तरी तो दिसण्यात अडथळा निर्माण करतो आणि सौंदर्याच्या दृष्टीने त्रासदायक ठरतो. त्यामुळे अनेकजण या छोट्याशा गाठींना दूर करण्याचे विविध मार्ग शोधतात.
चामखीळ म्हणजे नेमकं काय?
चामखीळ म्हणजे त्वचेवर तयार होणाऱ्या लहान मऊ गाठी. या गाठी सहसा मान, बगल, पापणी, छातीखाली, पोटाजवळ किंवा कमरेभोवतीच्या भागात दिसतात. हे शरीरातील त्वचेचा घर्षण होणाऱ्या भागांमध्ये अधिक दिसतात. वैद्यकीय भाषेत यांना Acrochordon असं म्हणतात.
वैद्यकीय तज्ज्ञांच्या मते, चामखीळ ही संसर्गजन्य नसतात आणि बहुतेक वेळा निरुपद्रवी असतात. मात्र काही वेळा या गाठी वाढू लागल्यास किंवा दुखू लागल्यास त्वचारोगतज्ज्ञांचा सल्ला घेणे आवश्यक असते.
सुरुवातीच्या टप्प्यात घरगुती उपाय फायदेशीर
चामखीळ लहान स्वरूपात असताना घरगुती उपायांनी त्यावर नियंत्रण मिळवता येऊ शकतं. लोकपरंपरेत आणि आयुर्वेदात काही नैसर्गिक उपाय यासाठी सांगितले जातात.
बोरीचा काटा आणि निवडुंगाचा चीक
बोरीचा काटा चामखीळ कमी करण्यासाठी उपयोगी ठरतो. यासाठी बोरीचा काटा काही वेळ पाण्यात भिजवून घ्यावा. त्यानंतर तो निवडुंगाच्या चीकामध्ये (Aloe Vera सारख्या द्रवात) बुडवून चामखीळीवर लावावा. हा उपाय दोन ते तीन दिवस नियमित केल्यास चामखीळ कोरडी पडून गळून पडण्यास मदत होते.
बोरीची पानं
त्वचेवर बेंड किंवा सूज आल्यास बोरीची पानंही उपयोगी ठरतात. काही पानं स्वतःच्या लाळेमध्ये कुस्करून थेट त्वचेवर लावल्याने त्या जागेवरील त्वचा शांत होते आणि सूज कमी होते, असा अनुभव अनेक लोक सांगतात.
वैद्यकीय उपचार काय आहेत?
जर चामखीळ मोठ्या प्रमाणात झाली असेल किंवा ती वाढू लागली असेल, तर घरगुती उपायाऐवजी वैद्यकीय उपचार घेणं योग्य ठरतं.
क्रायोथेरपी (Cryotherapy): या उपचारात द्रव नायट्रोजनने चामखीळ गोठवली जाते.
लेझर थेरपी: लेझरच्या साहाय्याने चामखीळ पूर्णपणे नष्ट केली जाते.
सर्जिकल रिमूव्हल: डॉक्टर छोट्या शस्त्रक्रियेद्वारे ती गाठ कापून टाकतात.
हे सर्व उपचार सुरक्षित आणि जलद परिणाम देणारे असतात, पण ते प्रशिक्षित त्वचारोगतज्ज्ञाकडूनच करून घ्यावेत.
महत्वाची टीप
वरील घरगुती उपाय लोकपरंपरेवर आधारित आहेत. कोणत्याही उपायांचा अवलंब करण्यापूर्वी त्वचारोग तज्ज्ञांचा सल्ला घ्यावा. प्रत्येकाची त्वचा वेगळी असते, त्यामुळे परिणाम व्यक्तिनिहाय बदलू शकतात.
