दिवाळी म्हटलं की घराची साफसफाई, सजावट, फराळाची तयारी आणि पाहुण्यांची लगबग सुरू होते. सणाच्या दिवसांत नातेवाईक, मित्रमंडळी घरी येतात. त्यामुळे घराचा प्रत्येक कोपरा स्वच्छ आणि नीटनेटका दिसावा, यासाठी विशेष मेहनत घेतली जाते. घर कितीही स्वच्छ केलं तरी अनेकदा फरशीवर चिकटपणा राहतो, पाण्याचे डाग दिसतात किंवा लादी पुसल्यानंतरही ती मळकटच वाटते. अशावेळी महागडे फ्लोअर क्लिनर वापरण्याऐवजी स्वयंपाकघरातील काही पदार्थांच्या मदतीने लादी स्वच्छ करण्याचा पर्याय वापरता येऊ शकतो. जाणून घेऊया, मॉपच्या पाण्यात कोणते तीन पदार्थ मिसळल्यास फरशीवरील तेलकटपणा आणि चिकट घाण काढण्यास मदत होऊ शकते.
लादी पुसूनही चिकटपणा का राहतो?
घरात रोज साफसफाई करताना अनेकदा मॉपचं तेच पाणी वारंवार वापरलं जातं. मात्र, पाणी धूळ आणि मातीने भरल्यानंतरही त्याच पाण्याने संपूर्ण घर पुसल्यास फरशीवरील घाण एका जागेवरून दुसऱ्या जागी पसरू शकते. याशिवाय स्वयंपाकघरातील तेलाचे डाग, मसाल्याचे कण, बाहेरून येणारी माती आणि दमटपणा यामुळे लादीवर चिकट थर तयार होतो. त्यामुळे केवळ पाणी वापरून फरशी पुसण्याऐवजी योग्य प्रमाणात क्लिनिंग मिश्रण तयार करणं उपयोगी ठरू शकतं.
मॉपच्या पाण्यात मिसळा हे ३ पदार्थ
१. पांढरं व्हिनेगर
पांढरं व्हिनेगर स्वच्छतेसाठी वापरलं जाणारं एक सामान्य घरगुती घटक आहे. फरशीवरील काही प्रकारचे डाग आणि चिकटपणा कमी करण्यासाठी त्याचा उपयोग होऊ शकतो. मात्र, व्हिनेगर प्रत्येक प्रकारच्या फरशीसाठी योग्य नसतं. मार्बल, ग्रॅनाइट किंवा ट्रॅव्हर्टाइनसारख्या नैसर्गिक दगडांवर त्याचा वापर टाळावा. कारण आम्लयुक्त व्हिनेगरमुळे अशा पृष्ठभागाची चमक कमी होऊ शकते.
२. भांडी धुण्याचं लिक्विड
स्वयंपाकघरातील फरशीवर तेलाचे डाग किंवा चिकटपणा असल्यास भांडी धुण्याच्या लिक्विडचा उपयोग होऊ शकतो. मॉपच्या पाण्यात याचे अगदी थोडेच प्रमाण मिसळावे. जास्त लिक्विड वापरल्यास फरशीवर साबणाचा थर राहू शकतो आणि लादी पुन्हा चिकट वाटू शकते.
३. एसेंशियल ऑइल
लादी पुसल्यानंतर घरात ताजेपणा जाणवावा आणि छान सुगंध दरवळावा असं वाटत असेल, तर एसेंशियल ऑइलचा पर्याय वापरता येतो. साफसफाईच्या पाण्यात इच्छेनुसार त्याचे काही थेंब घालू शकता. मात्र, यामुळे फरशीवरील घाण निघतेच असं नाही; त्याचा मुख्य उपयोग सुगंधासाठी होतो.
लादी पुसण्यासाठी क्लिनिंग मिश्रण कसं तयार कराल?
एका बादलीत कोमट पाणी घ्या. त्यात अर्धा कप पांढरं व्हिनेगर, एक छोटा चमचा भांडी धुण्याचं लिक्विड आणि आवडीनुसार एसेंशियल ऑइलचे काही थेंब मिसळा. त्यानंतर मॉप या पाण्यात बुडवून चांगला पिळून घ्या आणि फरशी पुसा. लादीवर जास्त पाणी साचणार नाही, याची काळजी घ्या. साफसफाई झाल्यानंतर खिडक्या उघड्या ठेवा किंवा पंखा सुरू करा, जेणेकरून फरशी लवकर सुकण्यास मदत होईल.
व्हिनेगर वापरताना ही काळजी घ्या!
व्हिनेगर प्रत्येक प्रकारच्या फरशीसाठी सुरक्षित असेलच असं नाही. मार्बल, ग्रॅनाइट किंवा ट्रॅव्हर्टाइनसारख्या नैसर्गिक दगडांच्या फरशीवर त्याचा वापर करू नये. अशा फरशीसाठी उत्पादकाने सुचवलेलं क्लिनर वापरणं योग्य ठरू शकतं. कोणतंही मिश्रण वापरण्यापूर्वी फरशीच्या एका छोट्या, सहज न दिसणाऱ्या भागावर चाचणी घ्या. तसेच व्हिनेगर किंवा इतर क्लिनर कोणत्याही ब्लीच अथवा रासायनिक स्वच्छता उत्पादनासोबत मिसळू नका.