Dussehra 2025 : विजयादशमीचा शुभ मुहूर्त नेमका कधी? जाणून घ्या तिथी, योग, शस्त्रपूजन मुहूर्त आणि महत्त्व

आश्विन महिन्यातील शुक्ल पक्षाच्या दशमी तिथीला साजरा होणारा दसरा म्हणजे विजयाचा आणि आनंदाचा सण. यंदा हा सण गुरुवार, २ ऑक्टोबर २०२५ रोजी साजरा केला जाणार आहे. भगवान श्रीरामांनी रावणावर विजय मिळवून माता सीतेची सुटका केली, त्या ऐतिहासिक क्षणाच्या स्मरणार्थ या दिवसाला विजयादशमी असेही म्हटले जाते. 'दश' + 'हरा' म्हणजे दहा डोकी असलेल्या रावणाचा नाश; यावरूनच या सणाला 'दशहरा' हे नाव मिळाले. नवरात्राचा दहावा दिवस म्हणून या दिवशी देवी दुर्गेच्या प्रतिमांचे विसर्जनही केले जाते.

तिथी व शुभ मुहूर्त
यावर्षी आश्विन शुक्ल दशमी तिथीची सुरुवात १ ऑक्टोबर सायं. ७.०१ वाजता होईल आणि समाप्ती २ ऑक्टोबर सायं. ७.१० वाजता होईल. उदयतिथीनुसार दसरा २ ऑक्टोबर रोजी साजरा केला जाईल. या दिवशी पूजेचा मुख्य मुहूर्त दुपारी २.०९ ते २.५६ पर्यंत आहे. तसेच दुपारी १.२१ ते ३.४४ या वेळेतही पूजा करता येईल. रावण दहनासाठी प्रदोषकाल सर्वात शुभ मानला जातो. सूर्यास्ताचा वेळ सायं. ६.०५ वाजता असल्याने यानंतर रावण दहनाची सुरुवात करता येईल.

दिवसाचे धार्मिक महत्त्व
दसऱ्याच्या दिवशी अस्त्र-शस्त्रांची पूजा, महिषासुरमर्दिनी माता दुर्गेची आराधना आणि श्रीरामांची पूजा केली जाते. या दिवशी सुरू केलेले नवीन कार्य यशस्वी होते, अशी श्रद्धा आहे. घरातील कलशातील पाणी पूजेनंतर सर्वत्र शिंपडल्याने नकारात्मक ऊर्जा नाहीशी होते असे मानले जाते. नवरात्रात ज्या ठिकाणी देवीची पूजा केली जाते, तिथे रात्रीभर तुपाचा दिवा लावल्यास घरात सकारात्मकता वाढते.

दसरा हा केवळ रावण दहनाचा सोहळा नाही, तर चांगल्याचा वाईटावर होणारा विजय, नवीन सुरुवातींचा संकल्प आणि एकतेचा संदेश देणारा उत्सव आहे.