उन्हाळ्यात थंडगार, हलकं आणि चविष्ट काहीतरी खायचं असेल, तर घरच्या घरी बनवलेलं पेरू आईस्क्रीम हा एक भन्नाट पर्याय ठरू शकतो. बाजारातील आईस्क्रीमपेक्षा हे आईस्क्रीम अधिक फ्रेश, नैसर्गिक आणि चवीला वेगळं लागते. पेरूचा नैसर्गिक गोडवा, कंडेन्स्ड मिल्कची क्रीमी चव आणि रोज सिरपचा हलका फ्लोरल टच यामुळे हे आईस्क्रीम उन्हाळ्यातील परफेक्ट डेझर्ट ठरते. कमी साहित्य, कमी वेळ आणि कोणत्याही मशीनशिवाय तयार होणारी ही रेसिपी मुलांपासून मोठ्यांपर्यंत सगळ्यांनाच आवडेल.
साहित्य :
२ कप पेरूचा गर (Guava Pulp)
१/२ कप साखर
१/२ कप कंडेन्स्ड मिल्क
१ कप फ्रेश मिल्क क्रीम
२ मोठे चमचे रोज सिरप
कृती :
सर्वप्रथम पिकलेल्या पेरूची साल काढून त्याचा गर वेगळा काढा. बिया गाळून फक्त मऊ पल्प तयार करून घ्या. यानंतर मिक्सरमध्ये पेरूचा गर, साखर, कंडेन्स्ड मिल्क आणि रोज सिरप घालून एकजीव ब्लेंड करून घ्या. मिश्रण गुळगुळीत आणि किंचित क्रीमी झाले की ते एका मोठ्या भांड्यात काढा.
आता त्यात फ्रेश मिल्क क्रीम घालून हलक्या हाताने चांगले मिसळा. यामुळे आईस्क्रीमला मऊ, रिच आणि क्रीमी टेक्स्चर मिळते. तयार मिश्रण एअरटाइट डब्यात भरून ७ ते ८ तास फ्रीजरमध्ये सेट होण्यासाठी ठेवा.
आईस्क्रीम पूर्ण सेट झाल्यानंतर स्कूप काढून सर्व्ह करा. वरून थोडासा रोज सिरप किंवा पेरूचे छोटे तुकडे घालून सजवू शकता.
टिप्स :
पेरूचा गर गाळून घेतल्यास आईस्क्रीम अधिक स्मूद होते.
अधिक क्रीमी टेक्स्चरसाठी फ्रेश क्रीम थंड करून वापरा.
रोज सिरपमुळे चवीला हलका सुगंध आणि सुंदर रंग येतो.
हवे असल्यास वरून चाट मसाला किंवा मिरची पावडर शिंपडून हटके ट्विस्ट देऊ शकता.
हे आईस्क्रीम सर्व्ह करण्यापूर्वी २ मिनिटे बाहेर ठेवा, म्हणजे स्कूप सहज निघतील.
