नाश्त्याला काहीतरी हलकं, चविष्ट आणि झटपट बनवायचं असेल तर रवा ढोकळा हा उत्तम पर्याय आहे. हॉटेलमध्ये मिळणारा ढोकळा मात्र छान पांढराशुभ्र, मऊ आणि जाळीदार असतो. घरी बनवताना तो तितका फुलत नाही किंवा कडक होतो, अशी अनेकांची तक्रार असते. पण बॅटरचं प्रमाण आणि वाफवण्याची योग्य पद्धत लक्षात ठेवली, तर घरच्या घरीही अगदी हॉटेलसारखा ढोकळा बनवता येतो. विशेष म्हणजे यासाठी बॅटर आंबवण्याची गरज नाही. पाहूया झटपट रेसिपी...
साहित्य
१ कप रवा
१ कप घट्ट ताजं दही
साधारण ½ कप पाणी
१ चमचा आले-हिरवी मिरची पेस्ट
१ चमचा तेल
चवीनुसार मीठ
१ छोटा चमचा इनो फ्रूट सॉल्ट
१ चमचा पाणी
सजावटीसाठी थोडी काळी मिरी पूड किंवा कोथिंबीर
फोडणीसाठी :
१ ते २ चमचे तेल
½ चमचा मोहरी
½ चमचा तीळ
कढीपत्ता
चिमूटभर हिंग
कृती
सर्वप्रथम एका भांड्यात रवा आणि घट्ट दही घ्या. दोन्ही व्यवस्थित एकत्र करून घ्या. त्यात थोडं थोडं पाणी घालत मध्यम घट्टपणाचं बॅटर तयार करा. बॅटरमध्ये गुठळ्या राहणार नाहीत याची काळजी घ्या.
तयार बॅटर झाकून साधारण १५ ते २० मिनिटं बाजूला ठेवा. यामुळे रवा दही आणि पाणी चांगलं शोषून घेईल आणि ढोकळा मऊ होण्यास मदत होईल.
यानंतर बॅटरमध्ये आले-हिरवी मिरची पेस्ट, तेल आणि मीठ घालून व्यवस्थित मिसळा. दरम्यान स्टीमरमध्ये साधारण २ कप पाणी ठेवून ते गरम होऊ द्या.
बॅटरमध्ये इनो फ्रूट सॉल्ट अगदी शेवटी घाला. त्यावर एक चमचा पाणी टाका आणि लगेच हलक्या हाताने एकाच दिशेने मिसळा. इनो घातल्यानंतर बॅटर फुलायला सुरुवात होते. त्यामुळे हे मिश्रण तयार केल्यानंतर लगेच वाफवण्यासाठी ठेवणं महत्त्वाचं आहे.
ढोकळ्याच्या प्लेटला थोडं तेल लावून घ्या. इनो मिसळलेलं बॅटर लगेच प्लेटमध्ये ओता. वरून थोडी काळी मिरी पूड किंवा कोथिंबीर घालू शकता.
प्लेट आधीच तयार असलेल्या स्टीमरमध्ये ठेवा आणि झाकण लावा. साधारण १० ते १२ मिनिटं वाफेवर ढोकळा शिजू द्या. शिजल्यानंतर लगेच प्लेट बाहेर काढण्याऐवजी काही मिनिटं थंड होऊ द्या.
हॉटेलसारखा ढोकळा बनवण्याची ‘सिक्रेट टिप’
ढोकळा मऊ आणि फुललेला हवा असेल तर इनो आधीच बॅटरमध्ये मिसळून ठेवू नका. स्टीमरमध्ये वाफ तयार झाल्यानंतर आणि ढोकळा वाफवण्याच्या अगदी आधी इनो घाला. इनो घातल्यानंतर बॅटर जास्त वेळ ठेवले तर त्याचा फुलण्याचा परिणाम कमी होऊ शकतो.
तसंच बॅटर खूप घट्ट किंवा खूप पातळ ठेवू नका. रवा दही आणि पाणी शोषून घेतल्यानंतर त्याची घट्टपणा तपासा आणि गरज असल्यास थोडं पाणी मिसळा.
ढोकळा थोडा थंड झाल्यावर त्याच्या चौकोनी किंवा आवडीच्या आकाराच्या वड्या कापा. कढईत तेल गरम करून त्यात मोहरी, तीळ, कढीपत्ता आणि हिंग घालून फोडणी तयार करा. ही फोडणी ढोकळ्यावर पसरवा.
हिरवी चटणीसोबत सर्व्ह केला की मऊ, पांढराशुभ्र आणि खमंग रवा ढोकळा तयार!
