चहामध्ये साखरेऐवजी गूळ किंवा मध वापरल्याने साखरेचे सेवन कमी होते, असा अनेकांचा समज असतो. मात्र, गूळ, साखर आणि मध या तिन्हींचे सेवन मर्यादित प्रमाणातच करणे गरजेचे आहे. गूळ किंवा मध हे साखरेला पूर्णपणे आरोग्यदायी पर्याय नाहीत. त्यामुळे केवळ साखरेऐवजी गूळ किंवा मध वापरल्याने आरोग्याला मोठा फायदा होतो, असे मानणे योग्य ठरणार नाही.
गूळ, मध आणि साखर... तिन्हींचे प्रमाण महत्त्वाचे
गूळ आणि मधामध्येही कॅलरी असतात आणि त्यांचा रक्तातील साखरेच्या पातळीवर परिणाम होऊ शकतो. त्यामुळे चहात साखरेऐवजी गूळ किंवा मध घातला, तरी त्याचे प्रमाण अधिक असेल तर त्याचा आरोग्यावर विपरीत परिणाम होऊ शकतो. त्यामुळे कोणताही पर्याय असो, त्याचे सेवन मर्यादित ठेवणे महत्त्वाचे आहे.
दिवसाला किती साखर योग्य?
आहारातून मिळणाऱ्या एकूण कॅलरींपैकी साखरेचे प्रमाण १० टक्क्यांपेक्षा कमी असावे, अशी शिफारस केली जाते. सामान्य व्यक्तीसाठी दिवसाला साधारण सात ते आठ चमचे साखर ही वरची मर्यादा मानली जाऊ शकते. मात्र, वाढदिवस, पार्टी, सण-समारंभ अशा प्रसंगी गोड पदार्थांचे सेवन वाढण्याची शक्यता असते. त्यामुळे सुरक्षित बाजू म्हणून दिवसाला तीन ते चार चमचे साखरेपुरते सेवन ठेवणे योग्य ठरू शकते.
गुळातून लोह मिळवण्याचा प्रयत्न नको
गुळामध्ये शुद्ध साखरेच्या तुलनेत लोहासह काही सूक्ष्म पोषक घटक असतात. मात्र, त्यातील लोहाचे प्रमाण फारच कमी असते. त्यामुळे शरीराची दैनंदिन लोहाची गरज पूर्ण करण्यासाठी गुळावर अवलंबून राहणे योग्य नाही. लोहासाठी हिरव्या पालेभाज्या, कडधान्ये, डाळी आणि इतर पौष्टिक पदार्थांचा आहारात समावेश करणे अधिक फायदेशीर ठरू शकते.
चवीनुसार पर्याय निवडा
साखर, गूळ किंवा मध यापैकी चवीला जो पर्याय आवडतो, तो निवडता येतो. मात्र, तिन्हींचे अतिसेवन टाळणे महत्त्वाचे आहे. साखरेचा पर्याय बदलण्यापेक्षा एकूण गोड पदार्थांचे आणि साखरेचे प्रमाण कमी ठेवणे हेच आरोग्यासाठी अधिक महत्त्वाचे आहे.
