जर तुम्हाला झणझणीत आणि चटकदार पदार्थ आवडत असतील, तर ठेचा पुलाव हा पदार्थ नक्की ट्राय करा. हिरव्या मिरचीचा ठेचा, भाज्या, पनीर आणि मसाल्यांचा भन्नाट स्वाद यामुळे हा पुलाव खूपच खास लागतो. कमी वेळात तयार होणारी ही महाराष्ट्रीयन डिश वर्किंग प्रोफेशनल्स, विद्यार्थ्यांसाठी किंवा झटपट घरगुती जेवण आवडणाऱ्यांसाठी उत्तम पर्याय ठरू शकते.
ठेचा पुलाव खास का ठरतो?
साध्या पुलावापेक्षा ठेचा पुलाव अधिक झणझणीत आणि चटकदार लागतो. हिरव्या मिरचीच्या ठेच्यामुळे या पदार्थाला खास महाराष्ट्रीयन फ्लेवर मिळतो. लसूण, मिरची आणि मसाल्यांचा स्मोकी स्वाद प्रत्येक घासाला अधिक टेस्टी बनवतो.
या पुलावासाठी फार महाग किंवा वेगळे साहित्य लागत नाही. घरात सहज उपलब्ध होणाऱ्या पदार्थांपासून हा पुलाव तयार होतो. शिवाय भात, थेचा आणि पनीर यांचे कॉम्बिनेशन पोटभर आणि स्वादिष्ट जेवणाचा अनुभव देते.
साहित्य :
२ कप शिजवलेला भात
२ टेबलस्पून हिरव्या मिरचीचा थेचा
१ कांदा बारीक चिरलेला
१ टोमॅटो चिरलेला
१ लहान बटाटा चिरलेला
१/२ कप पनीरचे तुकडे
२ टेबलस्पून शेंगदाणे
१ टेबलस्पून तेल किंवा तूप
१ टीस्पून मोहरी
कढीपत्ता
चवीनुसार मीठ
सजावटीसाठी कोथिंबीर
कृती :
कढईत तेल किंवा तूप गरम करून त्यात मोहरी, कढीपत्ता आणि शेंगदाणे घाला. शेंगदाणे कुरकुरीत होईपर्यंत परता. आता त्यात कांदा, टोमॅटो आणि बटाटा घालून भाज्या मऊ आणि हलक्या सोनेरी होईपर्यंत परता. यानंतर पनीरचे तुकडे घालून एक मिनिट हलके परता. त्यात हिरव्या मिरचीचा ठेचा घालून सर्व मिश्रण व्यवस्थित एकजीव करा.
त्यात शिजवलेला भात घालून हलक्या हाताने मिक्स करा, जेणेकरून मसाला प्रत्येक तांदळाला व्यवस्थित लागेल. आवश्यकतेनुसार मीठ घालून पुलाव मंद आचेवर दोन मिनिटे शिजू द्या. गॅस बंद करून वरून कोथिंबीर घाला. ठेचा पुलाव दही किंवा पापडासोबत गरमागरम सर्व्ह करा.
टिप्स :
उरलेला भात वापरू शकता - हा पुलाव बनवण्यासाठी फ्रिजमधील उरलेला भातही वापरू शकता.
ठेच्याचे प्रमाण चवीनुसार ठेवा - अधिक तिखट आवडत असल्यास ठेचा जास्त घालू शकता. मुलांसाठी बनवत असाल तर प्रमाण कमी ठेवा.
पनीरऐवजी भाज्याही वापरू शकता - पनीर नसेल तर मटार, गाजर किंवा स्वीटकॉर्न घालूनही पुलाव स्वादिष्ट लागतो.
