नवरात्रीत आपण आदिशक्तीच्या नऊ रूपांची पूजा करतो. देवी कधी शौर्याचे, कधी करुणेचे तर कधी मातृत्वाचे प्रतीक ठरते. आजच्या काळातही काही स्त्रिया त्यांच्या कार्यातून हाच देवीचा अविष्कार आपल्या समोर आणतात. अशा स्त्रियांमध्ये गायिका पलक मुच्छल हे नाव विशेषत्वाने घ्यावे लागेल. कारण तिने स्वरांच्या माध्यमातून केवळ संगीत जगतात आपली ओळख निर्माण केली नाही, तर हजारो निष्पाप मुलांचे जीव वाचवून खरी स्त्रीशक्ती काय असते याचा प्रत्यय दिला.
लहानपणापासून समाजासाठी समर्पण
पलकचा प्रवास अगदी लहान वयात सुरू झाला. ज्या वयात इतर मुले खेळण्यात रमून जातात, त्या वयात तिने समाजसेवेचा ध्यास घेतला. १९९९ मध्ये कारगिल युद्धादरम्यान, केवळ पाच वर्षांची असताना तिने इंदूरमध्ये घराघरांत जाऊन देशभक्तीपर गाणी गायली आणि शहीद सैनिकांच्या कुटुंबीयांसाठी २५,००० रुपये गोळा केले. त्या लहानग्या पायांमध्ये राष्ट्रप्रेमाची ताकद होती आणि स्वरांमध्ये करुणा दडली होती. हीच तिच्या पुढील आयुष्याची पायाभरणी ठरली.
गाण्याच्या माध्यमातून जीवनदान
पलकने वयाच्या अडीच वर्षांपासून गायन सुरू केले, पण तिच्या आवाजाचा खरा उपयोग तिने गरजूंना मदत करण्यासाठी केला. सातव्या वर्षी तिने मुलांच्या हृदय शस्त्रक्रियांची जबाबदारी उचलली. एका लहानशा गाडीला स्टेज बनवून त्यावर गाणी गात ती पैसे जमवत असे. लोकेश नावाच्या एका मुलाचा जीव वाचवण्यासाठी केलेला हा प्रयत्न पुढे तिच्या समाजकार्याचा आधारस्तंभ ठरला. ज्या वयात इतर मुले अभ्यास आणि खेळ यात रमलेली असतात, त्या वयात पलक इतर लहान मुलांना जीवनदान देत होती.
हजारो हृदयांचे ठोके वाचवले
पलकने तिच्या संपूर्ण गायन कारकिर्दीला समाजकारणाची जोड दिली. तिच्या 'दिल से दिल तक' या मोहिमेअंतर्गत हृदयविकाराने ग्रस्त मुलांची शस्त्रक्रिया करण्यात आली. आजवर तिने ३,५०० हून अधिक मुलांचे हृदय वाचवले आहे. हे कार्य केवळ भारतापुरते मर्यादित नाही; तिने नेपाळ, बांगलादेश, पाकिस्तान अशा देशांतील मुलांनाही मदत केली आहे. अंध आणि दृष्टिहीनांना आर्थिक आधार दिला आहे. तिच्या या अद्वितीय समाजकार्यामुळे तिचे नाव गिनीज बुक ऑफ वर्ल्ड रेकॉर्ड्स आणि लिम्का बुक ऑफ वर्ल्ड रेकॉर्ड्समध्ये नोंदवले गेले.
स्टेजपासून 'फाउंडेशन'पर्यंतचा प्रवास
पलकने 'पलक मुच्छल हार्ट फाउंडेशन' या संस्थेची स्थापना केली. तिच्या स्टेज शो आणि कार्यक्रमांतून मिळणारी सर्व कमाई ती मुलांच्या उपचारासाठी खर्च करते. एकेकाळी ती तीन तास गाऊन केवळ एका मुलाची शस्त्रक्रिया भागवण्याएवढे पैसे कमवत होती, परंतु आज तिच्या एका शोमधून १०-१२ मुलांचे जीव वाचवण्याएवढी रक्कम गोळा होते. कधी कधी या कामासाठी तिला कर्जसुद्धा घ्यावे लागते, पण तिच्या मते, 'हे कर्ज म्हणजे पुण्याचे कर्ज आहे.'
नवरात्रीत आपण देवीच्या विविध रूपांची पूजा करतो. हीच शक्ती पलक मुच्छलसारख्या स्त्रियांच्या रूपाने आज समाजात कार्यरत आहे. तिच्या स्वरांमधील माधुर्याने हजारो मुलांचे जीवन उजळले. ती करुणामयी मातेसारखी आहे, जी प्रत्येक रुग्णमुलाच्या वेदनेत स्वतःचा वाटा उचलते. तिचे कार्य म्हणजे आधुनिक काळातील करुणामयी शक्तीचे जिवंत रूप आहे.
