पुणे : पावसाळा सुरू झाला की लोणावळा, मावळ आणि सह्याद्री परिसरात ट्रेकिंगसाठी पर्यटकांची मोठी गर्दी होते. मात्र, याच काळात निसरडे कडे, घसरडे दगड आणि अचानक वाढणारा पाण्याचा प्रवाह यामुळे अपघातांचाही धोका वाढतो. अशाच एका निष्काळजीपणामुळे लोणावळ्यात एका तरुणाचा पाय घसरून तो खोल दरीत कोसळला. सुदैवाने तो झाडावर अडकल्याने त्याचा जीव वाचला. या थरारक बचावकार्याचा व्हिडिओ सध्या सोशल मीडियावर व्हायरल होत आहे.
नेमकं काय घडलं?
व्हायरल व्हिडिओसोबत शेअर करण्यात आलेल्या माहितीनुसार, ही घटना बुधवारी लोणावळा परिसरातील ट्रेकदरम्यान घडली. ट्रेकिंग करताना संबंधित तरुणाचा तोल गेला आणि तो खोल दरीत कोसळला. मात्र, तो दरीतील एका झाडावर अडकल्याने मोठी दुर्घटना टळली. त्यानंतर स्थानिक नागरिक आणि बचाव पथकाने तातडीने त्याची सुखरूप सुटका केली.
या घटनेचे नेमके ठिकाण आणि तरुणाची ओळख अद्याप अधिकृतपणे जाहीर करण्यात आलेली नाही.
पावसाळ्यात ट्रेकिंग करताना 'या' गोष्टी लक्षात ठेवा
मुसळधार पाऊस किंवा हवामानाचा इशारा असेल तर ट्रेक टाळा.
घसरड्या कड्यांवर, दरीच्या टोकावर किंवा धबधब्यांच्या अगदी जवळ जाऊन फोटो काढू नका.
चांगली पकड असलेले ट्रेकिंग शूज वापरा.
शक्यतो एकट्याने ट्रेकला जाऊ नका; गटासोबतच जा.
अधिकृत आणि सुरक्षित ट्रेकिंग मार्गाचाच वापर करा.
मोबाईलमध्ये पूर्ण चार्ज, टॉर्च आणि आवश्यक आपत्कालीन क्रमांक सेव्ह करून ठेवा.
स्थानिक प्रशासनाने बंदी घातलेल्या किंवा धोकादायक घोषित केलेल्या ठिकाणी जाणे टाळा.
प्रशासनाचा इशारा
भारतीय हवामान विभागाने (IMD) पुणे घाटमाथा परिसरासाठी ऑरेंज अलर्ट जारी केला आहे. मुसळधार पाऊस, जोरदार वारे आणि दरड कोसळण्याचा धोका लक्षात घेता प्रशासनाने पर्यटकांना धबधबे, ओसंडून वाहणारे ओढे, किल्ले आणि टायगर पॉइंट, लोहगडसारख्या धोकादायक ठिकाणी जाणे टाळण्याचे आवाहन केले आहे. तसेच लोणावळा ग्रामीण परिसरात ३१ ऑगस्टपर्यंत BNSS कलम १६३ अंतर्गत प्रतिबंधात्मक आदेश लागू करण्यात आले आहेत.
(disclaimer : वरील खबरदारीच्या सूचना या सर्वसामान्य सुरक्षा माहिती आणि तज्ज्ञांकडून वेळोवेळी दिल्या जाणाऱ्या मार्गदर्शक सूचनांवर आधारित आहेत. ट्रेकिंग किंवा पर्यटनासाठी जाण्यापूर्वी स्थानिक प्रशासन आणि हवामान विभागाने जारी केलेले ताजे इशारे व मार्गदर्शक सूचना अवश्य तपासा.)
