शिवसेना पक्षाचे संस्थापक दिवंगत बाळासाहेब ठाकरे (Balasaheb Thackeray) यांचा आज १३ वा स्मृतिदिन. आजच्या दिवशी बाळासाहेबांचे पुतणे, मनसे अध्यक्ष राज ठाकरे यांनी सोशल मीडियाच्या माध्यमातून आपल्या काकांविषयी भावना व्यक्त केल्या आहेत. यासोबतच, त्यांनी भाजप आणि शिंदे गटाला अप्रत्यक्षरीत्या टोला लगावला. बाळासाहेबांची प्रतिमा चोरून हिंदुत्वाचे वारस म्हणून मिरवणाऱ्यांची किंवा त्यावर मतं मागणाऱ्यांची गंमत वाटत असल्याचे राज ठाकरे (Raj Thackeray) यांनी पोस्टमार्फत म्हटले आहे. तसेच, बाळासाहेब हे कमालीचे हिंदुप्रेमी होते, पण म्हणून त्यांच्यातली चिकित्सक वृत्ती लोप पावली नाही. त्यांनी हिंदूंकडे व्होटबँक म्हणून पाहिले नाही, असे राज ठाकरे यांनी नमूद केले.
राज ठाकरे नेमके काय म्हणाले?
हिंदुहृदयसम्राट आणि माझे काका स्व. बाळासाहेब ठाकरे यांची आज पुण्यतिथी. देशाच्या इतिहासात भाषिक अस्मितेच्या जोरावर एक प्रचंड चळवळ निर्माण करून त्यातून एका राजकीय पक्षाला जन्म देणारे बाळासाहेब. आणि पुढे जातीय अस्मिता तीव्र होण्याच्या काळात आणि भारतीय जनता पक्षाचा कमंडलवाद फोफावायच्या आधी हिंदू म्हणून अस्मिता जागी करणारे बाळासाहेबच. पण म्हणून बाळासाहेबांनी हिंदूंकडे व्होटबँक म्हणून नाही पाहिलं. त्यांच्यासाठी हा विषय अस्मितेचा होता, धर्माप्रतीच्या प्रेमाचा होता. आणि हे करताना बाळासाहेबांनी, प्रबोधनकारांकडून आलेला तर्कवाद पण सोडला नाही. बाळासाहेब हे कमालीचे हिंदुप्रेमी होते, पण म्हणून त्यांच्यातली चिकित्सक वृत्ती लोप पावली नाही.
बाळासाहेबांची प्रतिमा चोरून हिंदुत्वाचे वारस म्हणून मिरवणाऱ्यांची किंवा त्यावर मतं मागणाऱ्यांची गंमत वाटते. ना त्यांना बाळासाहेब माहित आहेत, ना त्यांना प्रबोधनकार माहित आहेत, (अर्थात ऐकणं आणि वाचणं यांचा दुष्काळ असल्यामुळे) त्यामुळे त्यांना बाळासाहेबांच्या विचारांची झालेली मशागत किती समृद्ध होती याची पुसटशी देखील कल्पना नाही! फक्त मतं, सत्ता मिळवणे आणि ती सत्ता मिळाल्यावर वाट्टेल तसं ओरबाडणं म्हणजे राजकारण हे रूढ होत असताना, समाजकारण आधी आणि मग राजकारण हे आमच्या विचारात रुजवणाऱ्या बाळासाहेबांच्या स्मृतीस महाराष्ट्र नवनिर्माण सेनेतर्फे विनम्र अभिवादन!
राज ठाकरे यांनी केलेल्या पोस्टमुळे महाराष्ट्राच्या राजकारणात चर्चा रंगल्या आहेत. त्यांच्या वक्तव्यावर कोणी काही प्रतिक्रिया देतंय का, हे पाहणं महत्त्वाचं ठरणार आहे.
