नागपूर : नागपूरच्या गोधनी परिसरातील जलशुद्धीकरण केंद्रात सोमवारी (दि. २४) मध्यरात्रीच्या सुमारास ९०० किलो क्षमतेच्या सिलिंडरमधून क्लोरीन वायूची गळती झाल्याने खळबळ उडाली. विषारी वायू जवळच्या निवासी परिसरात पसरल्याने ४० हून अधिक नागरिकांची प्रकृती बिघडली, तर अनेकांना खोकला आणि श्वास घेण्यास त्रास झाला. काही बाधितांना उपचारासाठी रुग्णालयात दाखल करण्यात आले. घटनेची माहिती मिळताच NDRF, अग्निशमन विभाग आणि आपत्कालीन पथके घटनास्थळी दाखल झाली. परिस्थिती नियंत्रणात आणण्यासाठी तातडीने बचावकार्य सुरू करण्यात आले.
मध्यरात्री वायूगळतीला सुरुवात
मिळालेल्या माहितीनुसार, ही घटना महाराष्ट्र जीवन प्राधिकरणाच्या गोधनी नगर परिषद जलशुद्धीकरण केंद्रात मध्यरात्री सुमारे १ वाजता घडली. केंद्रातील ९०० किलो क्षमतेच्या क्लोरीन सिलिंडरमधून अचानक वायूची गळती सुरू झाली. काही वेळातच हा वायू जवळच्या निवासी परिसरात पसरला. त्यामुळे परिसरातील नागरिकांमध्ये भीतीचे वातावरण निर्माण झाले.
नागरिकांना खोकला, श्वास घेण्यास त्रास
क्लोरीन वायूच्या संपर्कात आल्याने अनेक नागरिकांना खोकला आणि श्वास घेण्यास त्रास होऊ लागला. परिस्थिती लक्षात येताच स्थानिक पोलिसांनी प्रशासकीय अधिकाऱ्यांच्या मदतीने नागरिकांना सतर्क केले. तसेच नागरिकांना सुरक्षित ठिकाणी जाण्याचा सल्ला देण्यात आला. बाधित झालेल्या काही नागरिकांना झिंगाबाई टाकळी येथील स्पर्श रुग्णालय आणि मेयो रुग्णालयात उपचारासाठी दाखल करण्यात आले.
अग्निशमन दल, NDRF घटनास्थळी
घटनेची माहिती मिळताच नागपूर महापालिकेच्या अग्निशमन विभागाने तातडीने बचाव पथक रवाना केले. श्वसन उपकरणांसह कर्मचारी आणि दोन वॉटर टेंडर घटनास्थळी पाठवण्यात आले. ऑरेंज सिटी वॉटरच्या कर्मचाऱ्यांनाही मदतीसाठी पाचारण करण्यात आले. परिस्थिती नियंत्रणात आणण्यासाठी राष्ट्रीय आपत्ती प्रतिसाद दलाचे (NDRF) पथकही घटनास्थळी दाखल झाले होते.
पहाटे ५.३० वाजता बचावकार्य पूर्ण
क्लोरीन वायूची गळती कमी झाल्यानंतर एनडीआरएफ, अग्निशमन विभाग आणि ऑरेंज सिटी वॉटरच्या आपत्कालीन कर्मचाऱ्यांनी संयुक्तपणे बचावकार्य सुरू ठेवले. पहाटे सुमारे ५.३० वाजता हे बचावकार्य पूर्ण झाले.
पथकांनी गळती होत असलेला ९०० किलोचा क्लोरीन सिलिंडर सुरक्षितपणे हलवला. त्यानंतर विषारी वायू निष्प्रभ करण्यासाठी हा सिलिंडर कॉस्टिक सोड्याचे द्रावण असलेल्या पाण्याच्या टाकीत बुडवण्यात आला.
महिनाभरापूर्वी सहारनपूरमध्ये अमोनिया गळती
महिनाभरापूर्वी उत्तर प्रदेशातील सहारनपूर जिल्ह्यातील एका मांस प्रक्रिया प्रकल्पातही वायुगळतीची घटना घडली होती. २२ जुलै रोजी एएलएम इंडस्ट्रीज लिमिटेडमध्ये अमोनिया वायूची गळती झाल्याने किमान १४ महिला कामगारांना रुग्णालयात दाखल करण्यात आले होते. गागलहेरी पोलीस ठाण्याच्या हद्दीत असलेल्या या प्रकल्पात महिला कामगार पॅकेजिंगचे काम करत असताना ही घटना घडली होती. अचानक झालेल्या अमोनिया गळतीमुळे अनेक कामगारांना श्वास घेण्यास त्रास, अस्वस्थता आणि चक्कर आली होती, तर काही महिला घटनास्थळीच बेशुद्ध झाल्या होत्या.
