पुणे : हवेली तालुक्यातील आष्टापूर गावातील शेतातून सुमारे ४० टन ऊस तोडून चोरी करणाऱ्या दोघांना लोणी काळभोर पोलिसांनी ताब्यात घेतले. चोरलेला ऊस अंदाजे ८८ हजार रुपयांचा असल्याचे पोलिसांनी सांगितले.
मुंढवा परिसरात राहणारे अनिल कामठे यांच्या कुटुंबाच्या मालकीची आष्टापूर येथील गट क्रमांक ८२२ मध्ये शेतजमीन आहे. कामठे आणि त्यांचे दोन भाऊ मिळून या जमिनीची शेती करतात. शेतातील सुमारे ५५ गुंठे क्षेत्रात सात महिन्यांपूर्वी उसाची लागवड करण्यात आली होती.
कामठे यांच्या आईची प्रकृती बिघडल्यामुळे ते आणि त्यांचे भाऊ मुंढवा येथील घरी गेले होते. या कालावधीत २० ते २३ ऑगस्टदरम्यान अज्ञात व्यक्तींनी ऊस मजुरांच्या मदतीने तोडून चोरून नेला. कामठे यांनी दिलेल्या फिर्यादीनुसार पोलीस ठाण्यात गुन्हा दाखल करण्यात आला.
