पुणे : दीनानाथ मंगेशकर रुग्णालयात डोळ्यांच्या शस्त्रक्रियेसाठी आलेल्या एका सहा वर्षीय चिमुरडीचा उपचारादरम्यान संशयास्पद मृत्यू झाल्याची घटना समोर आली आहे. या प्रकरणी शिवसेनेने जोरदार आंदोलन केले.
प्रियांशी बागडे असे या मृत बालिकेचे नाव असून, ती पारनेर तालुक्यातील सुपे येथील रहिवासी होती. प्रियांशीला डोळ्यांतील तिरळेपणाचा त्रास असल्याने त्यावर उपचार करण्यासाठी तिला या रुग्णालयात दाखल केले.
मात्र, शस्त्रक्रियेपूर्वी ऑपरेशन थिएटरमध्ये प्रियांशीच्या डोळ्यांत औषधी ड्रॉप टाकल्यानंतर तिची प्रकृती अचानक बिघडली. तिला रक्ताच्या उलट्या सुरू झाल्याने तातडीने अतिदक्षता विभागात हलवले, दुर्दैवाने उपचारादरम्यान तिचा मृत्यू झाला. या प्रक्रियेदरम्यान रुग्णालय प्रशासनाने पालकांना माहिती दिली नाही.
